2476/2024-2025

Dated Aizawl: the 11 October 2024 : Vawiin chawhma dar 10:00 khan Pi Lalrinpuii Social Welfare&Tribal Affairs, Women&Child Development minister chuan, National COmmission for Women leh Mizoram State Commission for Women tangkawp buatsaih, Mizorama ruihhlo do kawnga hmeichhiate tihchak leh zual dan tur inzirtirna 'Awareness programme on empowering women combating substance abuse in Mizoram', I&PR Auditorium, Aizawla neih chu khuallian niin a hawng.

Kalkhawmte hmaah hian khuallian Minister Pi Lalrinpuii chuan ruihhlo in kan ram a tihbuai nasatzia ngaihtuahin hmeichhiate chu thinlung taka tuar nasa berte an nih tih sawiin,, a Dona kawnga tlawmngai pawlte inpekna chu ropui a tih thu a tarlang a. Mizoram chu GOlden Triangle hnaih a awm a nih avang leh a kawng kan nih avanga ruihhlo chu  hluar a nih thu sawiin, hei hi hre chungin sawrkar kallai chuan urhsun leh zualin ruihhlo chu a do tih a sawi a. Ruihhlo chuan a pui a pang, a hmei a pa a thliar  lo va, chutih rualin ruihhlo tite enkawlna Kan neih te chu mipate  tan a nih tlangpui avangin ruihhlo ngawl vei hmeichhiate chu an langsar lo mai nia a hriat thu a sawi a. Hmeichhiate zinga  ruihhlo ngai tam zel  chu nawhchizawrhna tihluartu pakhat nia a hriat thu sawiin, ruihhlo do kawnga chhungkaw pawimawhna leh nu ten mawhphurhna lian tak an chelh chu hre turin kalkhawmte chu a chah nghal bawk a ni.

Vawiina inzirtirna hun hman hi Pi K. Lalremruati, Interim Chairperson,Mizoram State Commission  for Women chuan kaihruaiin kalkhawmte lo lawmna thu a sawi a. Dr. Lalhriatzuali Ralte IAS, Director, Social Welfare & Tribal Affairs chuan hun hman chhan leh hun hmandan tur tlangpui sawi fiahin, he hun atana sawm bik mithiamte hnen atangin ruihhlo ngai hmeichhiate leh a enkawlna kawnga mawhphurtute tana hriat tur pawimawh tak takte ngaihthlak chhunzawm nghal a ni a. Hei hi kalkhamte nena sawihona hun 'interactive session'-in chhunzawmin, Pi Laltanpuii, Member, Mizoram State Commission for Women chuan lawmthu sawina neiin hun hman hi a khar a ni.

Technical Session-ah hian thupui hrang hrang hmanga mithiamte thusawi ngaihthlak niin, Ruihhlo ngai hmeichhiate leh an harsatna tawhte, 'Women drug users and problem faced by them' tih thupui hmangin Pi Lalfakawmi, Co-ordinator, Mizoram Social Defence & Rehabilitation Board chuan presentation a pe a. Dr. Ruth Lalmuanpuii, Joint - Director, Directorate of Health and Medical Education chuan, damdawi lam leh pianphunga ruihhlo laka hmeichhiate chak lohna awm theite, 'Vulnerability of Women to drug use&addiction . The medical & biological reasons' tih thupui hmanga presentation pein, Changtlung leh zuala ruihhlo ngai hmeichhiate hriselna kawnga tanpui dan tur,  'Way forward in ensuring better health for women who use drugs' tih thupui hmangin Pi Lalhlupuii Sailo, Chief Executive Officer, Mizoram Social Defence & Rehabilitation Board pawhin presentation a pe bawk a ni.