2477/2024-2025
Aizawl 11th October, 2024 : Vawiin chawhma dar 11 khan A.T.I Auditorium, MINECO, Aizawl-ah Mizoram Information Commission buatsaih Right to Information Week, 2024 hman a ni a. Dr. Vanlalthlana, Information & Public Relations Minister chuan khuallian niin he hun hi a hmanpui.
Khuallian I&PR Minister chuan hriatna chu chakna a nih angin huaisen taka kan tihtur kan tih theih nan information data dik leh tha kan neih a pawimawh thu a sawi a. RTI Act chu kan ram Sorkar inrelbawlna tha zawk democracy tichangtlungtu ni se a duh thu sawiin sawrkar khalh ngil a, a hnathawkte fimkhurtirtu ni zel se a duhthu a sawi. Sawrkar pawh hian vengtu tha a neih a pawimawh thu sawiin mipuite chu he dan hi taima taka hmang a, kan thlan tlin te vil zui chu opposition lam chauh ni lovin mitin mawhphurhna a nih thu a sawi.
Vawiinah DAA/SPIO/SAPIO kalkawmte hnenah an mawhphurna te tha taka hlen tura chahin kan thlan tlin MLA te chu zalenna (priviledge) an neih angin RTI zawhna an neih te Ni 15 chhunga acknowledgement pe a, a hun tiam Ni 30 chhung ngeia chhanna pek chu an tihmakmawh a nih thu a sawi a. Mipuite chakna information kawltu kan nih angin RTI dan hmanga zawhna awmte chu rang taka information dik pek chhuah mai bakah mipuite hriat tur pawimawh website kaltlanga a tul anga puangzar zung zung turin a chah a ni.
Pu H. Dolianbuaia, Secretary, MIC kaihhruaiin Minister hian RTI Award a sem nghal a. Tun tum hi Award buatsaih vawikhatna niin RTI Excellence Award 2024, pakhatna atanga pathumna dawngtute chu -
1. Mizoram Public Service Commission (MPSC)
2. General Administration Department (GAD)
3. Department of Personnel and Administrative Reforms (DP&AR) an ni a,
Consolation Prize Administrative Training Institute (ATI) leh Information Communication Technology (ICT) -in an dawng bawk a ni.
Pu John Neihlaia, Chief Information Commissioner chuan kalkhawmte lawmna thu sawiin RTI chu Citizens te tichaktu leh Constitution a Rights hrang hrang kan neih te ang tho-a kan dikna chanvo a nih angin hman tam leh hman tangkai a pawimawh thu a sawi a. He dan hnuaia Section 4-in a phut angin mipuite hriat tur pawimawh Suo Moto Disclosure neih tur anih angin Department tina DDA leh SPIO te chu he section phut anga dan zawm turin a ngen a. Sorkar Website a Information update loh te chu update tura ngenin he dan section 26-in a phut angin mipuite hriatah RTI Act 2005 chungchang inzirtirna Awareness campaign kalpui thin tur a nih thu a sawi bawk a ni.
Mizoram-ah RTI Act hman a nih atanga kumin October Ni 1 thleng khan department hrang hrangah zawhna 35080 dawn a ni tawh a. Chung atanga an zawhna chhanna-ah lungawi lohna avanga First Appellate, Department Appellate Authority (DAA) a zualko chu 561 chauh a nih thu sawiin SPIO leh SAPIO te thawhthat zar a nih thu a sawi a. Second Appellate Authority, Mizoram Information Commission (MIC)-a Chief Information Commissioner ho a ngaihtuah thinah 172 chauh a luh thu a tarlang bawk.
RTI Act Rules-in a phut angin VCP leh LC Chairman te SPIO (State Public Information Officer) anga ruat vek an ni a. Vengchhung hnathawh leh hmalakna te pawh he dan hmanga zawhna siam theih a nih thu leh NGO te'n sawrkar atanga tanpuina (30% of project Cost emaw Nuai khat, a tlem zawk zawk) dawng te chu hman atangin a tupawh a duh apiangin cheng 10 chawiin an hriat duh zawhna an dil theih bawk thu he hunah hian tarlan a ni.
Pu Mangjangam Touthang, Information Commissioner chuan hun tawp lawmthu sawiin he hunah hian DDA, SPIO, SAPIO Aizawl a awm zawng zawngte an tel tha hle a ni.
Attachment
- Loading attachment...
