712/2026-2027

Aizawl; 26th May, 2026: Vawiin chawhma khan Power & Electricity (P&E) Department changtu Minister Pu F. Rodingliana hovin, Mizoram ah Nizung chakna hman tangkai zelna turin PM Surya Ghar: Muft Bijli Yojana (rooftop solar installation) inhriattirna leh Celebration of Solar Month chu Secretariat Conference Hall 1, MINECO-ah hman a ni.

P&E Minister Pu F. Rodingliana chuan thu sawiin kan ram ina mamawh ber chu Mahni Intodelhna tura hmalak hi a ni; tiin, chumi kawnga kan mamawh ber pakhat chu Power (kawphetha) a kan intodelh hi a ni a ti bawk. India ramah tun dinhmunah Mizoram chu PM Surya Ghar-ah chuan pakhatna a ni mek hi lawmawm a ti a ni.

Minister chuan kan ramin leilung nghenga tharchhuah hrang hrangte dahthat leh sawngbawlna lam a hmasawnna turte leh Industry lama hmasawn nan te Power hi kan mamawh a ni, a ti. Mizoramin hma a sawn zel theihna turin chak takin hma an la zel a, chu mi a bul ṭan nan Solar Installation Mizoramah tih mek a nih chu lawmawm a ti thu a sawi bawk a. Sawrkar building 70 chuangah Rooftop Solar dah tum a nih thu sawiin, tun dinhmunah Sawrkawr building 50 vel ah dah mek a nih thu a sawi bawk. Minister chuan "Kan ram ṭhan nan Power hi kan mamawh a, kan ramin a ṭangkai taka kan hman theih chu Rooftop Solar Energy hi a ni" a ti.

P&E Commissioner & Secretary, Pi K. Lalrinzuali chuan he hun hi kaihruaiin, Sawrkar laipui, Ministry of Renewable Energy in May thla chu Solar Month-ah a puan angin; vawinah pawh he hun hi hman a ni. Mizoram chu boruak a thiang a, Solar Energy siamchhuah a remchang hle a; sorkar laipui hmalakna ang in PM Surya Ghar scheme hnuaiah rooftop solar installation neih mek hi a hlawkpui tur chu consumer/mipuite bawk kan nih a avangin, mipuite hnena puangzar turin kalkhawm te a chah bawk.

P&E Department buatsaih Celebration of Solar Month-ah hian P&E Department Chief Engineer, (System Operation) Er. Laltlanthanga'n PPT hmangin PM Surya Ghar Muft Bijli Yojona chungchang tarlangin, Mizorama Solar Energy dinhmun report a pe bawk. P&E Department, Engineer-in- Chief Er. Ngursailova Sailo chuan thuchah pawimawh sawi bawkin, P&E Department, Joint Secretary Er. Laldawngliana'n lawmthu sawiin he hun hi a khar a ni.

He programme hi Mizoramah solar energy hman chakzualna tur leh rooftop solar installation chungchang mipuite hriattirna a ni a; programme zawh hnuah Secretariat Main Gate hnaih-ah vendor-te awmin, rooftop installation chungchang hrechiang duhte an lo pui bawk a ni.

PM SURYA GHAR: MUFT BIJLI YOJANA chungchang:

“He Scheme hnuaiah hian I inchungah Rooftop Solar dah ve la, Central leh Mizoram Sorkar atangin subsidy lo dawng ve ta che. Khawvel sik leh sa inthlak danglam zelah, kan chenna boruak tichhe lo zawngin Rooftop Solar hmang ngei hian I kawlphetha hman tur siamchhuak la, I hman bang te P&E Department hnenah rawn hralh ve ta che”.

Central Subsidy:
1 kWp : Rs. 33,000/-
2 kWp : Rs. 66,000/-
3-10 kWp: Rs. 85,800/-

Mizoram State Subsidy:
1. AMC Area : @Rs. 12,000/kWp
2. AMC Area to 100KM: @Rs. 14,000/kWp
3. 100KM to 200KM: @Rs. 16,000/kWp
4. Above 200KM: @Rs. 18,000/kWp

Hrechiang duh tan: 9862527932

Registration & Application: pmsuryaghar.mizoram.gov.in leh National Portal pmsuryaghar.gov.in.