Vawiin chawhma khan Circuit House Conference Hall, Lunglei ah Pu H.Lalengmawia, IAS, Secretary, Power & Electricity, Gov’t of Mizoram hovin P&E Lunglei Circle hnuai a thawktute, Chhimbial Chhantu, Media leh P&E hnuai a contractor te nen meeting neih a ni.

Eng. H.Zoliana, SE, Lunglei Power Circle in meeting hi kaihruai in, Pu H.Lalengmawia chuan P&E Department hmalakna leh hmachhawp te sawi in Mizoram in a power mamawh san lai ber in 100 MW kan mamawh a, tualchhung a siamchhuah hi 10mw vel a ni, chuvangin kan power mamawh hi State pawn atangin kan lei thin a, power lei nan thlatin vaibelchhe 25 ai a tlem lo kan hmang a ni. Hetiang a nih avang hian mitin in renchem takin power hi hmang ila, electrict hmanrua kan lei in energy hmang tlem zawk eng bawk si LED chu mitin in hmang thei ila nasa takin sum kan sen tlem phah a beisei thu a sawi. Mizoram pumpui ah thingtlang khua eng la pek loh te chu kumin february thla chhung a eng pek vek tum a ni. Tunhma hun rei deuh atanga eng pek tawh khuarel chhiatna avang leh enkawl that tawk loh avanga eng leh ta lo khua tepawh eng pe leh turin theihtawp chhuah mek a ni a ti. Lunglei District Chawngte area leh Siaha District eng lo nei tawh thin nei leh ta lo te chu Department leh Contractor T&T Project Ltd, Guwahati ten hma an la mek a ni. Lawngtlai ah Division office, Bungtlang ‘S’ leh Tuipang ah te Sub Division office hawn a ni a, hei hian nasa takin P&E Department hnathawhna kawng ah rah tha a chhuah mek. Hydel Project lam ah Sawrkar in theihtawp a chhuah a 60MW Tuirial Hydel Project pawh zawh thawkhat a ni tawh in, 5MW Tlawva Project pawh 90% zawh a ni tawh. Hydel Project ringawt chuan kan khamkhawp power thar chhuah a awl ai lo hle tih Sawrkar in a hria a, chuvangin Solar energy lam ah nasa takin tan a la thar a, 20MW Vankal ah P&E Department in hma a lak mek thu a sawi. Private developer ten North Lungpher ah 30MW leh Sihhmui ah 10MW siam turin pawmsak  ni tawh in, ZEDA in Tlungvel ah 2MW siam turin hma an la mek bawk a ni. Solar Policy Of Mizoram in a sawi ang in Sawrkar office zawng zawng chung ah solar plant siam vek tur a ruahman a ni.

Er.Lalramliana, Chief Engeneer pawhin P&E Department hnathawh tarlang in 132KV Melriat  - Lunglei line pawh 80% thawh zawh tawh a ni a, Hnathawh a kal chak theih nan ban phun na hmun tur ah mimal ten an ram phal tak a pe turin a ngen a ni. 33KV Sub Station thar Buarpui, Saiphai ah leh Khawbung ah siam zawh tawh a ni a, Lawngtlai leh Siaha ah Sub Station bun na atan tender tichhuah mek a ni. Lugsen ah 132KV Sub Station thar siamna tur work order pek ni in, 25MVA 132/33KV power transformer lian bun tura hna tan mek a ni a ti bawk.