Vawiin khan Kolasib Circuit House ah Power Grid Corporation chuan Corporate Social Responsibility (CSR) atangin Sub-Hqrs YMA Kolasib kutah Bolero Ambulance an hlan.

Ambulance hi Pu H.Lalengmawia, IAS, Secretary, Power & Electricity chuan District Health Society Chairman, Kolasib Bawrhsap ni bawk Pu R Zarzosanga kutah a hlan a, Pu R Zarzosanga chuan Dr.Lalhlimpuia, CMO Kolasib kutah hlan chhawngin, ani hian Pu C.Liankunga, President Sub-Hqrs YMA kutah a hlan chhawng leh a ni. Public Sector Undertaking (PSU) kalphungah chuan CSR atang hian Sawrkar Department kaltlang loin NGO te kutah tanpuina emaw hnathawhna tur emaw pek phal a nihloh avangin Ambulance hi Health & Family Welfare Department kaltlanga pek a ni.

He hunah hian Pu H.Lalengmawia chuan thu sawiin Corporation te hian an hnathawhna hmanga hlep (Net Profit) an neih atangin za a pahnih (2%) hi CSR hmangin khawtlang tan an luangchhuak tur a nih thu a tarlanga, Power Grid Corporation ten Kolasib khaw mipuite hman tangkai theih tur Ambulance an pek avangin Power Grid Corporation hotute chungah lawmthu a sawi a. Hemi ti hlawhtling tura sulsutu pawimawh tak Health Minister Pu Lal Thanzara hmalakna chu fakawm a tih thu sawiin, DC kalchhuak ta leh tuna DC ni mek bakah Sub-Hqrs YMA hruaitute hmalakna leh inpekna chu hriat hmaih chi a nilo a ti bawk.

P&E Secretary chuan Corporation ten CSR hnuaiah khawtlang tana an luanchhuah ngei a ngaih angin Corporation hrang hranga Mizo Officer hnathawkte chu mahni Ram leh Hnam tan he CSR hi a tam thei ang ber hailut turin a sawm a. Tun dinhmunah P&E Department chuan Mizoram chhunga hmun hrang hrangah Solar Power hmanga tui Pump na tur project 50 vel an duang thu a tarlang bawk a ni.

Pu H.Lalengmawia chuan Mizo Society ah lungphum pawimawh tak 3 heng Politics, Kohhran leh Tlawmngai Pawl hrang hrangte an awm a ni tiin heng lungphum 3 te hi pheikhai rual taka ke an chhep loh chuan Ram leh Hnam humhalhna kawngah kan tum ram kan thleng theilo anga, lungrual taka ke kan pen ho erawh chuan Hnam chimral kan ni ngailo ang a ti. Tun tuma Sub-Hqrs YMA ten Ambulance an dawng pawh hi a lawmpui thu sawiin YMA chu mipuite tana an rawngbawlna ah zau zawk leh chak zawka ke an pen theih nan duhsakna a hlan bawk a ni.

He hunah hian Power Grid Corporation hotute bakah Tlawmngai pawl hrang hrang hruaitute an tel a. Hlanna inkhawm hi District Health Society Chairman, Kolasib Bawrhsap ni bawk Pu R Zarzosanga chuan a kaihruai a, Pu C.Liankunga, President Sub-Hqrs YMA in lawmthu sawina in hun a khar a ni.