Power and Electricity Department changtu Minister Pu R. Lalzirliana chuan Mizorama power transformer substation lian ber - New 132KV Grid Power Sub-Station, Zuangtui chu vawiin chawhnu dar 1:00 khan mipui hman theih turin a hawng ta.

Pu R.Lalzirliana chuan transformer lian hunna 132KV Grid Power Sub-Station hawn a ni ta chu lawmawm a tih thu sawiin hei hi P&E engineer-te leh thawktu zawng zawngte thawhrim rah a ni, a ti. Ramin hma a sawn a, kawlphetha mamawh pawh a pung zel a, peak hour-a 80MW vel hmang thin khan tunah chuan 110 MW te a thleng pha tawh, Minister chuan a ti a. Tuna kan hman mek hi nakin lawkah kan khawp kham loh hun a thleng leh mai dawn tiin inzarpharh zelna tur leh hmun dang atanga electric lo lut dawnna hmun neih a pawimawh avangin sawrkar ramte humhalh a tul hle a ni, a ti. Mipuite mamawh eng pe tura rim taka, mutmu pawh tuah hman mang lova hna thawk thin te thawhrimna leh inpekna Pu R.Lalzirliana chuan a fak a, mipuite pawhin an thawhrimna kan hriatpui tul a tih thu a sawi bawk.

Mizoram-ah Electric mamawhna nitin a sang chho zel a, tuna 132KV Sub-Station-a Transformer lian awmte hian mipui mamawh a phuhru zo tawh lova, chumi sutkian nan chuan Transformer lian 25MVA, 132/33KV pahnih chu hman theihin he Zuangtui Sub-Station tharah hian bun fel a ni ta a ni. He Transformer lian hi a hmaa hman thin 12.5MVA, 132/33KV aiin a letin a lian zawk a ni. He Zuangtui Sub-Station hi Mizoram pawn atanga Power lakluhna hmunpui leh hmasa ber a ni a, Aizawl khawpui bakah Mizoram District pakua (9)-ah Electric power a pe chhuak a, chu chu Mizoram-in Power kan hman hmun thum a then a hmun hnih (2/3) vel a ni.

Zuangtui Sub-Station hlui hi kum 1988 November thla-ah 6.3MVA, 132/66KV Transformer-in bul tan a ni a, kum 2001 July thla-ah 12.5MVA, 132/33KV Transformer-in tihlen leh a ni a. Zuangtui Sub-Station hmun hlui hi kum 1992-a chhiatna lian tak lei tlahniamin a nuai atang khan a him lo hle tih hriat a ni a, hmun him a sawn leh Power demand sang zel avanga Transformer lian zawka thlakna tur leh he Sub-Station sawnna tur hian NEC Fund Rs. 1869.30 Lakh leh State Plan Fund Rs.911.12Lakh, a vain Rs 2780.42 lakh sen a ni. Kawlphetha mamawhna lo sang chho zel tur pawh he Sub-Station thara Transformer lian hian hun engemaw chen min phuhru ngei thei turah P&E Department chuan an ngai a ni.

He hna hi NEC Fund leh State Plan Fund atangin Power & Electricity Department hnuaiah Aizawl Power Circle kaihhruainain Generation Division leh Zuangtui Sub-Station Sub-Division-ten an thawk a ni.

Programme hi P&E Secretary Dr.Lalzirmawia Chhangte chuan a kaihruai a. Aizawl Power Circle SE Pu Lalrinmawia'n technical report pe in Chief Engineer (System Operation) Er.Lalduhzuala Sailo chuan lawmthu sawiin hun hnung a khar a ni.