Vawiin khan Home Minister Pu Lalchamliana hovin Central Training Institute (CTI), Sesawng-ah Home Guards & Civil Defence Raising Day vawi 57-na ropui taka lawm a ni.
He hun hmanpuitu khuallian Pu Lalchamliana chuan India ram leh Mizorama Home Guards & Civil Defence thanchhoh dan tlangpui sawilangin, Home Guard leh Civil Defence te chu sipai tak tak anga a kul a tai a ram venhimna hna thawk tura din ni lem lo mahse mahni inpe a, ramchhung venhim hna thawktu sipai te a tul anga thlawp leh mipui vantlang rawngbawla theihtawp chhuah thin an ni a ti a. India ram chhunga state tamtakah venhimna hna an thawh thin bakah Home Guard and Civil Defence volunteer te chu chhiatrupna leh chetsual palh rikrum thilah an tangkai em em a ni tiin, helamah pawh hian kan hotuten huang zauhin MRHG & CD hnuaiah hian State Disaster Response Force (SDRF) Unit te pawh neih theih dan ngaihtuah ila a inhmeh dawn hlein ka hria a ti a ni.
Home Minister chuan MRHG & CD thupui “Nishkam Seva”, Mizo tawnga “Mahni inphata midangte tana nun” hi a ropui hle a, Home Guard volunteer te chauh ni lovin mitin hian nunpui theuh thei ila a duhawm hle a ni, a ti a.MRHG & CD volunteer te chu uniform ha an nih ang ngeiin discipline tha tak a vawn hi an nihna in a ken tel tlat a ni a, uniform hak chuan inlulinna ni lovin mipui rawngbawl tura mawhphurhna lian tak a pe tih hi hre thar leh thin tura chahin, MRHG & CD volunteer zawng zawng te chu ram leh khawtlang rawngbawlnaa hmingtha zual zel turin duhsakna a hlan a ni.
All India Home Guard & Civil Defence Raising Day hi December ni 6, 1962 a ni a. Mizoramah chuan kum 1964 March thla ah Hony. Lt. Lalmawia leh Mizorama ex-servicemen thahnemngai thenkhatin an din a, kum 1966 a Zoram buai vangin engemaw chen tihtawp a ni a. Sawrkar Laipui ruahmanna in kum 1971, December ni 6 khan din that leh a ni. A tirah Assam Home Guard hnuaiah awmin kum 1973 March thla atang "Mizoram Home Guards" ti a vuah a ni. Training na hmun atan Aizawl-a Republic Veng Field an hmang thin a, kum 1977 ah ITI veng, Aizawl-ah Regional Training Centre din niin kim 1991 atang Central Training Institute (CTI), Sesawng hi hman a ni. Kum 1985 August ni 10 ah Mizoram sawrkarin Home Guard chu department hrangah a puang a, Commandant General-in a hova, tunah hian thawktu ministerial staff leh non-ministerial staff 158 awmin Mizoram Home Guard Volunteers strength hi 1168 a ni a. Hmeichhe home guard tan 5% hauh sak thin chu tunhnai khan 12% a tihpun a ni.
Mizoram Home Guards & Civil Defence te hian Sorkar hmun pawimawh hrang hrang – Bank, Deputy Commissioner office leh bungalow, Central Jail leh District Jail hrang hrang, Power House leh Godown hrang hrang, All India Radio hmun hrang hrang te leh Transport, PWD, Traffic, Government Press, NEEPCO hmun leh building pawimawh te venhim hna an thawk mek a. Tun dinhmunah Mizoram ah MRHG&CD Company 4 awmin, duty post hrang hrang hmun 150 vel zetah an insem darh mek a. Hetianga hna hrang hrang an thawhna Non-State Govt Agencies te atang hian Home Guard rawihna hetiang hian hmuhchhuah a ni.
2017-18 ah Rs. 247,01,982/-
2018-19 ah Rs. 262,32,913/-
2019-20 ah Rs. 162,36,118/- (Nov thleng).
Vawiin Home Guards & Civil Defence Raising Day inkhawmah hian Maj. Zosangliana Hualngo, Commandant General-cum-Additional Director in inlawmna thuchah a sawi a, Mizoram Ex-servicemen's League President Col. John Zama'n thusawina hun a hmang a, he hun hi Pi Lalbiaksangi, Additional Secretary, Home Department, Pi Maria CT Zuali, IG, Prisons leh sawrkar mipawimawh ten an hmanpui bawk a ni.
