Rural Department, Khawzawl in Khawzawl Rurban Cluster huamchhunga thingtlang khua te chawikanna tura kawng hrang hranga hmalakna a kalpui mekah vawiin khan Shyama Prasad Mukherji Rurban Mission hnuaiah khaw 8 - Arro, Tualpui, Khualen, Tualte, Ngaizawl, Chawngtlai, Neihdawn leh Hmuncheng khua atanga Khuai khawi tura thlan chhuah mi 40 tan Khuai khawi Training an buatsaih.

Vawiin chawhma dar 10:30 atang khan Khawzawl Block BNRGSK Hall-ah Training on Meliponiculture (Stingless Bee Breeding for Sustainable Development) hi an buatsaih a. Training hawngtu Dr. Saithangpuia Sailo, BDO, Khawzawl chuan RD Department, Khawzawl in Khawzawl Rurban Cluster huamchhunga khaw 13-ah hmasawnna hna chi hrang hrang a thawh mek thu leh hmalakna chikhat atana khuai khawi Training buatsaih a ni chu lawmawm a tih thu a sawi a, khuai khawitu kalkhawmte chu an Training hlawkpui ngei tura fuihin khuai an khawinaah hlawhtling ngei turin duhsakna a hlan a. Training-ah hian KVK Khawzawl Head & Senior Scientist Dr. Henry Saplalrinliana'n khuai khawitute hi Training pe in zawhna leh chhanna hun te an hmang ho a ni.

RD Department, Khawzawl hian Khawzawl Rurban Cluster hnuaia khaw 13-ah kawng hrang hranga hma la in loneitute hnenah Organic Fertilizer te semin, mipuiten eizawnna nghelnghet an neih theihna turin Coffee hmun te, Thingpui hmun te siam a ni tawh a. Heng bakah hian MGNREGS leh MLA LAD Fund te nen tangkawpin Tanky te, Retaining Wall te, Step te, Link Road te leh hmasawnna chi hrang hrang thawh a ni a, khaw 13-ah hian Biodiversity Management Committee pawh din tuma hmalak mek a ni.