No.6774/2020-2021  

Aizawl, the 4th December 2020 : Vawiin khan Power & Electricity Minister Pu R. Lalzirliana chuan ZEDA in Tlungvel a, 2 MWp pe chhuak thei Grid Connected Solar Photovoltaic (SPV) Power Plant a hawng, he Power Plant hi Mizorama nizung chakna hmanga kawlpetha siamna Power Plant hmasa ber a ni.

Pu R. Lalzirliana chuan Sawrkarin kawlpetha siamchhuah a ngaihpawimawh thu leh hemi kawnga hma lakna hrang hrang zingah nizung chakna hmanga kawlpetha siamchhuah chu Sawrkarin a pawimawhna hriain Solar Power Policy pawh duan a nih thu a sawi a. Nizung hmanga kawlpetha siamchhuahna hmunpui nia sawi Gujarat, Rajasthan leh India hmun dangte leh Mizoram dinhmun tehkhinin  an ni siamchhuah zat ang te chu kan siamchhuah a beisei awm lova, mahse Mizoramin lui khuap thei kan nei tha a, chuvangin lui khuapa kawlpetha siamchhuah hi loh theih lovin kan ngaihpawimawh thar a tul a ni, a ti.  

Power Minister chuan India Solar Map ah Tlungvel  khua a lang ve ta chu lawmawm tiin phal taka he project atan ram petu Tlungvel khawtlang leh NGO te chunga lawmthu a sawi a. Hripui leng leh inkharkhipna karah tluang taka he hna zawh thei nana ZEDA hma lakna te chu fakawm a tih thu a sawi. Vankal a 20 MW pe chhuak thei Solar Power Plant sak hna pawh thawh mek anih thu leh Saitual dai ah 5 MW pe thei pawh din tum mek a nih thu a sawilang bawk a ni.

He hun hmanpuitu dang Assembly Deputy Speaker leh Tuikum bialtu MLA ni bawk Er. Lalrinawma chuan tunlai khawvel boruak chhe zel ngaituahin nizung hmanga kawlpetha siam chu thil tha tak, environment tan pawha nghawng thalo nei lo anih thu a sawi.

Program hi Commissioner & Secretary, Power & Electricity, Pu Biaktluanga,IAS in kaihruaiin nizung hmanga India in kawlpetha a siamchhuah tum dante leh Sawrkarin a ngaihpawimawh dante a sawi. Pastor Gospel Thanmawia chuan tawngtaina hun a hmang a. Power Plant chungchang, khawl leh a kaihhnawih thil dang chanchin Technical Report chu Er. David Ramnunsanga, Director ZEDA in a sawi.

SPV Power Plant Tlungvel sak hna hi August ni 13, 2018 ah tan niin November ni 5, 2020 khan a enchhinna trial run neih a ni a.He Power Plant sak nana sum ruahman chu nuai 1400 niin Mizoram Sawrkar tum vek a ni. He hna ah hian Civil leh General Component ah cheng nuai 213 Sen niin Solar leh Electrical component ah cheng nuai 1187 sen a ni. 

He SPV Power Plant hi Tlungvel tlangah bun niin Solar Module 5340 dah a ni a, kawlpetha a siamchhuah thei tam ber chu 2 MW anih avangin 2MWp tih a ni. 1 MVA Inverter pahnih te, 1 MVA Transformer pahnih te, Evacuation line 33 KV LILO te, SCADA system pakhat te hi Power House ah bun a ni bawk a. Solar Module te tlang pharh ah bun niin a cable inzamna zawng zawng belhkhawm pawh 11632 metre laia thui a ni a. Module tihfai nan Solar water pump pawh bun a ni a. SPV Power Plant hi ram acre 5 velah bun a ni a. Kumtin he plant hian kawlpetha 3 MU(million units) vel a siamchhuah generate beisei a. Kum 5 chhungin a enkawl hna Operation & Maintenance hi he Plant buntu Swastik Solar Kolkata in an ti dawn a ni.

Sawrkar Laipui Power Policy peng pakhat Renewable Purchase Obligations (RPO) angin state zawng zawngin an kawlpetha hman ral atanga chhutin za zela engmaw zat hetiang renewable –nizung, thli, leh adangte an hman tel a ngai a, an hman loh chuan sum sengin renewable Certificate lei a ngai thin a. Mizoramin kan kawlpetha hman atanga chhutin za zelah 8.75 hu chu renewable energy kan hman a ngai a. Tlungvel Solar Power Plant hian kumtin Sawrkar sum cheng nuai 169 vel hum tura chhut a ni.