No.6773/2020-2021 

Vawiin chawhnu khan SAD Conference Hall, MINECO-ah Mizorama COVID-19 hri leng mek chungchang thlirhona neih a ni a. Health Minister Dr. R.Lalthangliana'n kaihruaiin, Home Minister Pu Lalchamliana, Medical Operational Team Chairman Dr. ZR Thiamsanga leh Chief Secretary bakah Health department, Home department leh I&PR department officialte an tel a, Mizoram Kohhran Hruaitute Committee, Jt. NGO Coordination Committee leh Indian Medical Association aiawhte an tel bawk a ni.

Vawiin thlirhona thutkhawmah hian Thla hmasa a Aizawl khawpui Lockdown hnua COVID-19 hri kai an tlem dan uluk takin an sawiho a, tun dinhmunah chuan lockdown puan khan awmzia a nei hle in an hria a. MoHFW in November ni 2, 2020 a Mizorama positive kai zat an chhut lawk danah December ni 4, 2020-a mi 4363 ni tawh tura an chhut chu tunah hian mi 3888 hri kai an ni tih tarlan a ni. Tunhnaia lockdown puan leh tura thuthang awm chungchangah vawiin thukhawm chuan kan inthlakthleng thut a, harsatna kan tawk emaw, kan dinhmun a derthawng ta viau a nih loh chuan "Lockdown" tumna a awm loh thu an tarlang a ni.

COVID-19 hri leng darh zel tur ven nan Aizawl khawpui hmun hrang hrangah awlsam zawka in test theihna tur mobile testing centre "kiosk" siam chungchangah a hmunhma ngaihtuahtu Medical Operational Team report ngaihthlak a ni a. Tunah hian Bawngkawn South Cultural Centre leh Chawlhhmuna Junior Cooperative Society Training Centre chu hman theih tura peihfel a nih tawh thu leh, sawrkarin notification a chhuah veleh hman tan theih turin engkim tihfel tawh a ni. Aizawl chhim lamah hmun laili pakhat an hual deuh chu remchan lohna a awm avangin hmun remchang dap mek a nih thu tarlan a ni ni bawk. Heng kiosks a sample testna man - RT-PCR, TrueNAT leh RAgT hi India ram khawpui hrang hranga an testna rate nen khaikhina mipuite tana phurrit lutuk ni lo a ruahman a ni bawk.

Medical Operational Team, Indian Medical Association leh Mizoram Government Doctors' Association tangkawpin Aizawl Dawrpui area zirchianna an neih report tarlan niin, mipui mimir veivak leh dawrkai ten mask an vuah tha a, dawrkaiten sulhnu mobile application QR code an tar bakah dawrtute chhinchhiahna tur register an dah bawk a, hetih rual hian dawr kawta thu/inpho te erawh chuan hetiang hi an ti lo tlangpui a ni.

Bazarpui building - sa zawrhna leh thlai, eichawp zawrhna ah sulhnu app leh register dah hian zawm a hlawh tha lo deuh tih an sawi a, a tul angin a hmun enkawltu department lamah thlen a tul nia hriat a ni. Hetih rual hian QR code hi mipui lamin a hman dan kan thiam tawk lo niin an hriat thu an tarlang bawk a ni.

COVID-19 hri kai, mahni in lama inenkawl (Home Isolation) te neih ngei ngei tur Home Care Kit - Digital Thermometer, Pulse Oximeter, N95 mask, Gloves mamawh zat ang tawk, PPE Full kit 3 tal, Hand Sanitizer te chu Home Isolation a awm ten ngai pawimawh thin se an duh thu tarlan a ni a. COVID-19 helpline hmang tangkai turin mipuite an chah bawk a ni.

Lai Autonomous District Council inthlan neih mekah vawiin hian vote thlak nimahse election process hi December ni 14 thleng a ni avangin sawrkarin theihtawp chhuahin a fimkhur tih an sawi a. Election duty a kal leh LADC area a mipuite chu uluk taka mahni inchika fimkhur taka awm chhunzawm rih zel turin an chah bawk a ni.

Vawiin thukhawm hian COVID-19 dona kawnga sawrkar department hrang hrang thawhhona a that avangin lawmthu an sawi a, kohhran leh NGO hrang hrangte bakah volunteers te, frontline workers te chungah leh mipuite hnenah lawmthu an sawi bawk a, theihtawp kan chhuah tlanna in rah tha a chhuah a ni tih tarlangin sawrkar thu zawma tang chhunzawm zel turin an ngen a ni.