Vawiin khan Power & Electricity Minister Pu R. Lalzirliana chuan Tuivamit a P&E Department ram chhunga, Department in Training Centre an buatsaih thar chu a hawng a, hemi rual hian he hmuna, Junior Executive (JE) te tana ni 3 awh training, Department in an buatsaih pawh a hawng nghal a ni.

Power & Electricity Minister Pu R. Lalzirliana chuan training centre hawn a, chutah training neih zui nghal chu thil awm zen zen lo leh thil danglam tak anih avangin lawmawm a tih thu a sawi a. Training Centre building chu sak thar loh, chei that ni chungin a work quality a tha hle nia a hmuh thu a sawi tel a. Intuaitharna leh intuaihriamna pawimawh dan sawiin Minister chuan tunah he training kan neih tur hi kan uluk a tha a, an kaisanna turah nghawng a neiin, kum tina sawrkar hnathawk te hnathawh that dan tehfung ACR ah te lang thei sela chuan training hian awmzia thui zawk a neih theih ka ring, a ni a ti a. P&E Department chu technical department pawimawh tak an nih angin hnathawk te mahni inzir zela, thil an thiam sa te an ennawn loh chuan an thil hriat te pawh theihngilh emaw, inthlahdah emaw a awl dawn a, chuvangin hna thil hi in ennawn fo a ngai tih mahnia hriat a pawimawh hle a ni, a ti a. P&E Department hnathawkte chu mipui tana malsawmna ni thin Department lian taka thawktu an ni tih hre nawn fo a, mipui rawngbawl hna an thawk ani tih theihngilh lo turin a chah a ni.

Power Minister Pu R. Lalzirliana chuan Department corporation chungchang sawiin a thu chuan corporation chu a tha a mahse keini ang ramah chuan thingtlang lam kan hnualsuat anga, an hnufum bik ang  tih a hlauhawm a, revenue an hmuh thatna, khawpuiah te chauh an bur chat anga, abakah chuan an inthlahdah ang tih a venthawn awm tiin a ngaihdan a sawi a ni. Department hnawthawk te chu rim takin mipui rawngbawl hna an thawk chungin sawiselna te an tawk thin a, mahse an hna hi tihsual emaw inthlahdah emaw chuan an mahni bakah midang pawhin nunna an chan theihna a ni thei a, chuvangin engkimah an fimkhur hle a tul tih a sawi.  

Minister Pu R. Lalzirliana chuan a Department dang chan Art & Culture Department huang chhung  chungchang sawiin tunhnaia kan puan hrang hrang  ah GI tag kan hmuh hi a lawmawmin a neitu nihna dan ang thlapin ka chang ta a, kan tih tur chu heng puantah dan dik taka tah a, a zia te humhalh a, hengte hi a tahtu te zirtir zel a tul, a ti a. Kan thuam thil hi kan ro tur a ni renga mahse thul chhunga khung tlat hi a tul lem lova, a zahawmna vawng chungin kan tihlar a pawimawh a ni tiin a hman dan tur inkhuahkhirh vak chu a tul lem lo niin a ngaihdan a sawi a ni.  

Pu C. Lianlunga, Engineer-in-Chief, P&E Department pawhin thu sawiin Training Centre hawn a nita chu Department tan mel lung pawimawh tak ani tiin mipui rawngbawlna kawnga khawtlang hruaitute leh Department hnathawk te chuan thu leh hla in hrilh zung zung nan social media an hmang tangkai hle tih a sawi lang bawk a ni.

Training Centre leh Training hawnna programme hi Pu Lalbiaksanga, Superintending Engineer(Mizoram State Load Despatch Centre) in kaihruaiin  Technical Report chu Pu H. Vanlalhlima, EE(MRT) atangin ngaihthlak a ni.

P&E Department Training Centre hi Tuvamit P&E ram chhunga awm niin substation building hlui cheithat a ni a, a cheithat nan hian cheng nuai 44.59 sen a ni a. A Building zau zawng hi square metre 189 niin Training Hall bik hi square metre 126 a zau niin AC leh projector te pawh dah a ni.

Tun tum Training programme ah hian Mizoram a P&E Division awm zawng zawng 24 atangin JE 24 tan training buatsaih niin an nitin hnathawh a pawimawh technical subject hrang hrang bakah safety leh metering chungchang ni 3 chhungin an zir dawn a. Hetiang training hi November lamah pawh buatsaih tum a nih thu Department hotute hian an sawi a ni.