242/2022-2023
Aizawl, the 22nd April 2022 : Power & Electricity changtu Minister Pu R. Lalzirliana'n vawiin khan Chaltlang, Chaltlang Lily Veng, Bawngkawn, Bawngkawn South, Durtlang, Durtlang North leh Durtlang Leitan venga Local Council hruaitute an vengah tlawhin khawpuia kawlpetha semna tihchangtlunna tur scheme thar Revamped Distribution Sector Scheme (RDSS) chungchang sawina hun a nei a, scheme hnuaia heng venga mamawh leh tul te khawtlang hruaitute nen an sawiho a. Minister hian Synod Hospital leh Aizawl Theological College te pawh tlawhin helai hmunaa RDSS hnuai hmalakna awm thei te a hmuna a en bawk a ni.

Pu R. Lalzirliana chuan RDSS scheme kaltlangin Aizawl leh khawpui danga kawlpetha power semna tihchangtlun tum a ni dan te sawiin he scheme DPR hi vaibelchhe 800 bawr vel a ni a, Central Sawrkarin a thuphungin min pawmsak tawh a mahse a sum hi an la released lova, kan nawr mek a, a ti a. He Scheme hnuaia khawpuia chhunga LT line thlak leh tihchangtlun te, electric hrui hman mek, hrui tuam chi Aerial Bunched Cable (ABC) hruai a thlak te, transformer thar dah belh leh a awmsa te siamthat leh tihchangtlun te leh Smart Meter hman te chu project in a huam tur thu a sawi. Smart Meter hman hunah chuan mipui tan awlsamna tam tak a siam sak theih bakah a bill chungchanga buaina awm thin te chu a kiam duak a beisei tiin a sawi.

P& E Department Corporation a leh, tha a tih loh thu sawiin Corporation chu sumdawng an ni a, Aizawl chu mihring kan tam avangin khawpui lam chu an enkawl tha mai thei a, mahse thingtlang lam chu an tan hlawkna tham a ni dawn lova, an enkawl that a rinawm lo a ni, a ti. P&E Department a hnathawktu te chu thih leh dam kara hnathawk an ni tiin thawktu indaihlohna kara pawh an hna tha taka an thawk nia a hmuh thu a sawi. NABARD loan kaltlangin leilet zau hmun tam taka kuthnathawktuten eng an neia, an hnathawh a awlsam theih nan heng zau te power eng luh tir tum a nih thu a sawi lang bawk. Local Council hruaitute chu line chungchanga an thil ngaihmawh te, an mamawh te ziakin Department ah thehlut turin thurawn a pe a ni.

Eng chhit man electric bill san chungchang sawiin Minister chuan a unit zawnga chhut in tuna tariff punna hi a sang em em lova, kumtin eng chhit man hi ennawn turin ruahmanna hi September thlaa siam a tul thin a, hei hi JERC in a lo chik leh thin a, hei hi kalphung pangngai a ni, a ti.

Pu Lalrinmawia, EE(Distribution) P & E Department chuan RDSS hnuai khawpuia kawlpetha pekchhuah leh sem tihchangtlun tum dan tlangpui te sawiin kawlpetha leh eng semchhuah kawnga mamawh an neih te chu Department te nen sawiho tura hetianga a bultan nan heng vengte an tlawh anih thu a sawi. Aizawl khawpui chhunga transformer dahna tur hmun rem a van avangin duh angin hemi kawnga hian chak taka hmalak a har tih a sawi lang bawk a ni.

RDSS hnuaia hian Aizawl leh Mizorama khawpui danga te, khawpui chhunga eng pek leh semchhuah tun aia tihchangtlun tum a ni a. Aizawl bikah chuan in tinah Smart Meter vuah tum a ni a, Zarkawt ah hei hi Pilot Project angin tihchhin mek a ni. He Scheme hnuaia hian LT line thlak leh siambelh te, transformer dahbelh leh siamthat te leh tuna electric hrui hman mek, Aerial Bunched Cable (ABC) a thlak te, Smart Meter vuah te leh a tul dangte a huam dawn a ni.