241/2022-2023
22.4.2022: Vawiin khan Mizoram Resource Mobilization Committee te chuan Chief Minister Pu Zoramthanga hovin CM pisa ah an inkawm a, an hmalak tawhna leh hmalak leh zelna tur an sawiho a ni.

MRMC hi January ni 21, 2022 khan din niin, tun thlengin vawi ruk an thukhawm tawh a. Hemi bakah hian consultation meeting vawi 2 an nei tawh a, consultation-ah hian department 6 an kawm tawh a ni. March thla tawp lam khan First Report an thehlut tawh a; Mizoram sawrkar hnuaia chhiah, a bikin VAT pek loh te chak zawka thin chhuah dan tur te, Department hrang hrangte bank accounts-a pawisa an kawl thin pung (interest) sawrkar sum bawma chhun a nih theih dan tur te leh sawrkar sumdawn (receipt) hrim hrim a pelhe loh nana receipt computerization chungchang te an First Report-ah hian an tel a.

Tunah hian Second Report an buatsaih mek a, hetah hian NLUP hnuaia Interest Free loan latute'n tun thlenga an rulh loh cheng nuai 674 chuang la awm thin chhuah dan tur te, huan pass te in hmun-a leh (convert) dawna ngai thin, hun engemawti chhung atana ngaihnathiamna pek chungchang te, GST lakna tur items, tun thlenga lak mumal la ni si lo, a bikin leilung hausakna lam atanga GST lak chungchangte bakah Hotel/ Homestay atanga GST lak chungchang a tel tur thu an sawi a ni.

Mizoram Resource Mobilization Committee hi January ni 21, 2022 khan sawrkarin a din a. Pu H. Rammawi, State Planning Board Vice Chairman chu Chairman atan ruat a ni a, Vice Chairman-ah Pu Liansuama, Ex-Miniter ruat a ni. Member Secretary chu Pu Ramchuana MFAS, Additional Secretary, Finance Department a ni a , member dangte chu, Pu N. Zokunga, MCS (Rtd), Pu Lalthansanga, MFAS (Rtd); Dr Lalrinchhana, Principal Adviser Planning Department; Lalthangliana Varte, Commissioner of Taxes (Rtd) leh Pu P.C. Laldinthara, MIMA President te an ni.

Vawiina Chief Minister ho a meeting-ah hian MRMC Chairman Pu H. Rammawi, chu a zin avangin Vice Chairman Pu Liansuama'n a ho a, member dangten an tawiawm a ni.