240/2022-2023
Aizawl, 22nd April, 2022 : Mizoram Legislative Assembly kum 50-na (Golden Jubilee) lawmna puala buatsaih Youth Parliament Competition Final chu vawiin khan Assembly Conference Hall-ah buatsaih a ni a. Assembly Speaker Pu Lalrinliana Sailo chuan khuallian niin he hun hi a hmanpui a, Parliamentary Affairs Minister Pu TJ lalnuntluanga, Deputy Speaker Er. Lalrinawma leh FLAM Member thahnemtakin an telpui bawk a ni.

He hunah hian khuallian Pu Lalrinliana Sailo chuan Mizoram Legislative Assembly in kum 50 tlinga mellung pawimawh tak a thleng chu Pathian kaihhruaina leh Zoram mipuite thlawpna tha tak vang a ni a ti a. Parliament leh Legislative Assembly zahawmnate, a kalphungte hi kan hriat tlan a tul a, Democracy kan kalpui danah ram puma rorelna sang ber chu Parliament a nih rualin State ah chuan Legislative Assembly hi a ni a. ramchhubg inrelbawlna leh mipuite nghawng dan pawimawh tak tak siamna hmun a nih avangin a hlu a, mipuite pawhin an kalphung hi an hriatchian a ngai a, a bik takin thalaiten a nihna dik tak hi kann hriat thuih a pawimawh a, Youth Parliament kaltlang hian mipuiteah zirtirna pek kan duh a, Youth Parliament hian thalaiten kan ram rorelna sang an hmuh dante pawh a hriatthiam theih avangin tupawhin kan tangkaipui ngei ka beisei a ni, a ti a. Youth Parliament hi an buatsaih chhunzawm zel tur thu a sawi a ni.

Khuallian chuan boruak chhia leh House a thil mawi lo awm lo tluka kan kal thei thin hi a lawmawm a, a bik takin Mizoram State Legislative Assembly proceeding hi India ramah a tha ber leh kalphung zahawm ber tiin min sawi thin a, inthlanpui kan kalpui dan pawh a felfai ber min ti hial thin a ni, a ti a. Heti chung hian hma kan sawnna tur leh kan insiamthatna tur tam tak a la awm a, mipuite pawhin min lo chika a hmasawn zanga kan kal zel theihna turin tan min lakpui turin ka sawm che u a ni,a ti.

Parliamentary Affairs Minister Pu TJ Lalnuntluanga pawhin thusawiin hruaitu hmasate thawhrimna leh inpekna zarah hma kan sawn zel a, MLA hmasa ten zahawm taka Assembly an lo vawn thinna kha a zar kan la zo chhunzawm zel a ni, a ti a. Ram tana tha turah chuan rorel lai leh eptu lamte pawhin rilri zau leh in hawng taka kan inrawn tawn fo thin hi a pawimawh takzet a ni, a ti bawk.

Mizoram Legislative Assembly kum 50-na (Golden Jubilee) lawmna puala buatsaih Youth Parliament Competition hi College zirlaite puala ruahman a ni a, Mizoram chhunga College 5 – Govt. Aizawl College, Govt. Hrangbana College, Govt. Kolasib College, Pachhunga University College leh Govt. Serchhip College te telin Finalah hian Govt. Aizawl College, Govt. Hrangbana College leh Pachhunga University College te an inel a ni.

Final ah hian endiktu (Panel of Judges) ah Dr Kenneth Chawngliana, Ex-Speaker, Pu Zodintluanga Ralte, MLA, Pu Vanlalhlana, MLA leh Dr F.Lalnunmawia, MLA te thuin a hnuaia tarlan ang hi an thutlukna a ni.

Pakhatna – Govt. Aizawl College niin tangkafai Rs. 1,00,000/- leh certificate an dawng.

Pahnihna – Pachhunga University College niin tangkafai Rs. 70,000/- leh certificate an dawng.

Pathumna – Govt. Hrangbana College niin tangkafai Rs. 50,000/- leh certificate an dawng.

Govt. Kolasib College leh Govt. Serchhip College ten participation prize tangkafai Rs 10,000/- leh Certificate an dawng ve ve a ni.

Best Parliamentarian atan Beirapatha Khaila, Govt. Hrangbana College thlan niin tangkafai Rs. 10,000/- leh certificate a dawng a, Brandon Lalramnghaka, Pachhunga University College chu pahnihna niin tangkafai Rs. 7000/- leh certificate a dawng a, lawmman pathumna dawngtu Lalhmangaihsanga, Govt. Aizawl College-in tangkafai Rs. 5000/- leh certificate a dawng a ni.