239/2022-2023
Aizawl, 22nd April, 2022: Vawiin khan Sports Minister Pu Robert Romawia Royte chuan Govt.Johnson College Campus, Shivaji Tillah-ah Multipurpose Gymnasium a hawng.

Minister chuan thu sawiin Govt Johnson College chu College naupang tê a ni chungin infrastructure zawh tawk zirlai thahnem tak, quality tha tak leh hmabak eng tak, zirlaiten College-a mark an luhpui aiin an chhuahpui mark thatna College nia a hriat thu a sawi a. He College atanga zirlaite chu khua leh tui tha, ram leh chhungkaw tan leh Kohhran tana mi chhenfakawm, ram hruaitu tha ni tura chher chhuah tum turin Teaching faculty te a ngen a.

Zirlaite pawh social media hman danah fimkhur tur leh a tha zawng leh hmasawn zawnga hmang tangkai turin a chah a, midangte thatna lai hmuh thiampuia, a tha zawnga social media hmang uar turin a fuih a ni.

Pu Roberta chuan Central Sorkar Ministry of Tourism-in College leh Higher Secondary Schools leh High School zawng zawngte chu Yuva Tourism Club din vek turin a ti a. Mizoramah pawh hei hi tih hlawhtlin tum a ni tih a sawi bawk.

Multipurpose Gymnasium hawnna inkhawm hi Govt Johnson College Principal Prof. K.Vanlalmawia'n a kaihruai a, Pi Zohmangaihi Ralte, Associate Professor-in hunserh hmangin, zirlai lam atangin thusawi, zai leh lamte entir a ni a. Pu Vanlalsawma, Associate Professor-in lawmthu a sawi a ni.

He Multipurpose Gymnasium building hi January ni 12, 2015 khan sak tan niin, UGC, College Development Fund leh External Exam fund atangin Rs 121,71,649/- senga sak zawh a ni a. Bungkawn College leh Johnson College te amalgamated niin Pu P.P. John-a hming chawiin Johnson College tih hming puin 1st November  2002 atang khan Deficit college ah hlan kai a ni a. October 11, 2007 khan provincialised a ni leh a. NAAC Accreditation 'C' Grade niin tunah hian Teaching staff 33 leh Non-Teaching staff 15, an vaiin staff 48 an awm a, department 6 awmin 2021-2022 session-ah zirlai 1330 an awm mek a ni.

Sport Minister hi Sports Director Pu Joseph H.Lalramsanga leh Pu John Tanpuia, MSSC Secretary ten an tawimawm a ni.