1712/2022-2023
Aizawl, the 26th August 2022 : Vawiin khan Power & Electricity changtu Minister leh Tawi bialtu MLA ni bawk Pu R Lalzirliana'n Government Saitual College Auditorium ah Saitual District atan Sawrkar Flagship Programme - Socio Economic Development Programme khuhhawnna hun buatsaih chu khuallian niin a hmanpui.

Pu R Lalzirliana chuan Covid hripuiin kum 2 chhung Sawrkar a tihbuai hnuah leh tunhnaia CSS sum tam tham tak Sawrkar in a pekchhuah hnua mi thenkhatten Sawrkar chu SEDP sem thei lo tura an ngaih leh an sawisel karah a taka SEDP kalpuia beneficiaries te hnena sum pekchhuah tur ruahman a ni ta chu chu lawmawm tiin SEDP hi mirethei leh chhumchhia te khaichhuahna programme a ni, a ti a. Harsatna hrang hrang karah hemi atana Chief Minister inpekna leh mi harsa zawkte dinhmun, tha zawka hlankai tumna kawnga a ruahman chu a fakawm tih thu a sawi bawk a. Tuna Family Oriented SEDP sum pekchhuah tur chu a first installment anih thu tarlangin nakum ah Instalment dang pek anih leh dawn a, nuai 3 a tlin hma chuan Sawrkarin pek zel a tum tiin a sawi.

Minister chuan theihtawp chhuahtu te chu Pathianin mal a sawm thinin a pui thin thu sawiin pawisa hi a tlem emaw a tam emaw lam a ni lova, tlem te pawh miin dik taka a hmana, rim taka a thawh chuan a dinchhuahpui thei a, hetianga dik taka sum kan thawhchhuah leh hmuh te hman chuan a daih rei a, vawi lehkhata hausa thut te chu nuamsa mahse an nawmsak a rei ngai lo, a ti a. SEDP beneficiaries te chu an sum hmuh ang ang te chu dinchhuahpui ngei tuma tan la turin a fuih a ni. SEDP hi Sawrkar Flagship Programme anih angin Line Department chauh nilo Department dang te pawhin he programme hi an ngaihhlut leh an ngaihpawimawh a tul thusawiin midangte kan ngaihhlut leh kan chawimawi hian mahni kan mawi zawk zel a ni, a ti a. Saitual a Line Department hrang hrang a thawktute chu SEDP a Family Oriented beneficiaries te an hlawhtlin ngei thei nan theihtawp chhuahpui tan lakpui turin a chah bawk a ni.

Saitual District a SEDP hawnna programme hi Pi Margaret Lalrinawmi Fanai, Addl. DC in kaihruaiin Pu Andy Lalfakzuala Varte SDO(Sadar) in District huamchhung SEDP beneficiaries ten'a Trade hrang hrang an thlan te tarlangin SEDP ruangam tlangpui a sawi a. Dr. Albert Vanlalruata SDC in lawmthu sawiin hun a khar a ni.

Saitual District huamchhunga MLA bial pathum ah SEDP beneficiaries chhungkaw 4500 an awm a, hei hi SEDP beneficiaries zawng zawng atanga chhutin za zelah 7.5 a ni a. Animal Husbandry & Vetyrinary Department hnuaia beneficiaries 1681; Agriculture Department hnuaia beneficiaries 1268; Commerce & Industries Department hnuaia beneficiaries 604, Fisheries Department hnuaia beneficiaries 93; Horticulture Department hnuaia beneficiaries 508; Land Resources, Soil & Water Conservation Department hnuaia beneficiaries 286; Sericulture Department hnuaia beneficiaries 41 leh Urban Development & Poverty Alleviation Department hnuaia beneficiaries 19 an awm a ni. Vawkvulh thlang beneficiaries an tam ber a, mi 1068 in he Trade hi an thlang a ni.