No.3017/2021-2022

Aizawl, the 17th November 2021: Vawiin khan Power & Electricity Minister Pu R.Lalzirliana chuan 132kV Sub-Station, E. Lungdarah, 132 kV Kawlphetha hruipui, Khawzawl leh Bukpui, Serchhip thlunzawmtu leh 132 kV Sub-Station, E. Lungdar te chu khawchhak tlangdung, hmarlam tlang dung leh chhim lam tlang dunga khaw tam takin tangkai taka an chhawr turin a hawng.

Power Minister Pu R.Lalzirliana chuan 132 kV Sub-Station leh 132 kV hruipui thlun thar te hawn theih a ni ta chu lawmawm tiin hnathawktute thawhrimna leh inpekna chu chhuanawm a tih thu a sawi hmasa a. Power Minister chuan Khawchhak tlangdung chu 132 kV Aizawl-Saitual-Khawzawl-Champhai line chauhin a chawm thin a, khawi laiah emaw line fault a awmin eng nasa takin a khaihlak thin a. Hetia Serchhip (Bukpui)-E.Lungdar-Khawzawl 132 kV line hman theih a lo nih takah chuan power supply hi Aizawl-Bukpui-E.Lungdar-Khawzawl atangin 132 kV level a pek theih a ni dawn a ni a ti.

Tunhmain line maintain tura shutdown lak hleih theih a nilo a, siamthat hna thawh a nih pawhin, line siamthatu ten rang taka an thawh a ngai thin a, duhthalin hna an thawk hman thin lo tih a sawi a. He line siam zawh a nih takah chuan, power supply a that phah hle tawh dawn a ni a ti. Tun hunah pawh hian Saitual leh Khawzawl inkar siamthat hna hi kar khat chhung department lamin an thawk tawh a, Khawzawl leh champhai district ten an thim phah tawh lo a ni a ti a. Chutiang bawkin Aizawl leh Serchhip inkar 132 kV line a chhiat thulhah pawh Serchhip hian Aizawl-Saitual-Khawzawl-E. Lungdar atangin power supply 132 kV level-in an hmu thei dawn bawk a ni a ti.

Heng bakah hian Saitual Sub-Station atanga eng pek Darlawn tlangdungte, Khawzawl Sub-Station atanga eng pek Ngopa tlangdung te, Serchhip Sub-Station atanga eng pek Hnahthial tlangdung te leh Buarpui tlangdung te pawhin eng regular zawk an hmu thei dawn a ni. Pu Zira chuan 132 kV Sub-Station E. Lungdar hman a nih chuan he Sub-Station chawm, 33kV Zaizawhtlang Sub-Station leh 33kV Khawlailung Sub-Station ten power supply regular zawk leh voltage tha zawkin an hmu thei dawn bawk tih a sawi a. Heng Sub-Station in a chawm khua ten eng regular zawk leh voltage tha zawk an nei thei dawn a ni a ti. Power Minister chuan Melriat leh Lunglei inkar te leh Barabi lama P&ED hnathawh te pawh Commission thuai tum a nih thu a sawi bawk a ni.

Power chu kan vaia kan mamawh, a tel lo in kan awm thei lo a. Chuvangin YMA, VC leh khawtlang ang pawhin power line/electric hrui enkawl that kawngah mawhphurhna pawimawh tak an nei a ni a ti a. Thawktute inpekna fakin Electric hrui thlungtu leh hun laklawha a chhiat thut a, zankhuaa kan thim lohna tura thawktu, thih hlauhawma awm reng thin te hi duhsak leh zah an phu a ni a ti.

132 kV Sub-Station thar leh 132 kV line thar hawnna inkhawm hi Pu H.Lalengmawia, Commissioner & Secretary, P&E chuan a kaihruai a. He hunah hian Technical Report on132 kV line from Serchhip to Khawzawl via East Lungdar and 132 kV Sub-Station at East Lungdar chu Er Lalduhzuala Sailo, E-in-C, P&ED in a pe a. Bukpui, Serchhip to Khawzawl 132 kV line ah hian section 2 - 45.51 Km a thui, 132 kV line from Serchhip to E. Lungdar leh 48.58 km a sei, 132 kV line from E. Lungdar to Khawzawl te a awm a. E. Lungdar Sub-Station, 33/11kV Sub-Station chu kum 2016 a Commission a ni a. He Sub-Station hian 33 kV Khawlailung Sub-Station leh 33 kV Zaizawhtlang Sub-Station te a chawm a, tunah hian 1.6MVA, 33/11 kV transformer pakhat (1) a awm tih a sawi a. Power Supply mamawhnate a lo san zel avang leh Saitual - Khawzawl - Champhai hian 132 kV source 1 (khat) chauh a neih avangin 132 kV Serchhip to Khawzawl via E. Lungdar line hi tihchangtlun a, E. Lungdar 33/11kV Sub-Station hi 132kV Sub-Station a siam a ni ta a ni a ti. Improvement of 132 kV line Bukpui to Khawzawl via E.Lungdar and Construction of 1x6.31MVA, 132/33 kV Sub-Station at E. Lungdar thawhna tura pawisa hman dan tlangpui chu Estimate Amount - Rs. 795.25 lakh, A/A amount - Rs. 795.25 lakh, E/S Amount - Rs. 795.76 lakh leh Expenditure - Rs. 795.76 lakh a ni tih a tarlang bawk a ni.

132 kV Sub-Station thar leh 132 kV line thar hawnnaah hian Er Lalhmingliani Hmar, CE, P&ED, Er Laltlanthanga, EE, Serchhip Division, C.Lalsawmliana, EE, Maicham Division, N.Vanlaiphai, P&ED Engineer te leh E.Lungdar khawtlang hruaitute an tel a. Er C.Lallawmsanga, SE (Trans), P&ED in lawmthu sawiin he hun hi khar a ni.