Mizorama kawlpetha thawnchhuahna leh semna kaihhnawih project, cheng vaibelchhe 714 man hu ‘Comprehensive Improvement of Transmission and Sub-transmission in Mizoram’ thawh nan Sawrkar Laipui leh Mizoram Sawrkar chuan June ni 7 khan inremna thuthlung Delhi-ah an ziak fel a. He project hi World Bank sum hmanga thawh tur a niin hna hi tan vat tura beisei a ni.

He scheme katlang hian 132kV line thar, kilometer 569; 33kV line thar kilometer 1066; 132 kV substation thar 6 leh 33 kV substation thar 31 te siam a ni dawn a. He sum hmang hian tunah 132kV leh 33kV sub-station hman mekte cheibawl leh thuamthat a ni bawk ang. He project hian power semchhuahna lamah bung thar a siam ngei beisei a ni.