Vawiin khan Parliamentary Secretary to Chief Minister Pu Lal Thanzara’n Mizoram Class –I Contractors’ Association ten an pawl khawmpui an office, Tuikual ‘S’ a an buatsaih chu a hmanpui. General Assembly hi an pawl President Pu P.C. Sapnela’n kaihruaiin hunserh Upa V. Neihkunga, Executive Member in a hmang thung.

Pu Lal Thanzara chuan Contractor intelkhawm te chu ram leh hnam veitu leh thinglung taka hmasawnna duhtu an nih angin an hna in sawrkar leh mipui mit a tlung em tih te an hnathawhnaah ngaihtuah turin a chah a. Hna an thawhna kawngah Mizoram siamtu an nih tih an hriat reng chu a pawimawh thusawiin Pu Lal Thanzara chuan thahnem ngaihna chang hriat loh chuan a tuartu chu keimahni, ramleilung fate tho kan ni dawn a ni a ti a. Chuvangin neitu rilru pu a hnathawh a tul takzet a ni, a ti bawk.

Lengte atanga Bungtlanga Multi Modal Project pawh tur kawng, World Bank Project II tia hriat lar, World Bank tanpuina hmanga lamlian sial tur chuan Mizoram tan malsawmna nasa takin a thlen a rin thusawiin he project hnuaia hna peng hrang hranga contractor, ram leilung faten an thawh ve theih tur a awm ngei a beisei thu a sawi a. Tunhnaia Tuivai Hydel Project MW 210 pe chhuak thei tur Public Private Partnership (PPP) Mode kaltlanga Viability Gap Funding (VGF) hmanga Sawrkar Laipui in a pawm pumpui tak chuan a puitlin hunah nasa takin kawlpetha lamah intodelhna a thlen theih bakah hralh chhuah tur tam tham tak a awm a rin thu a sawi bawk.

General Assembly ah hian kum hnih chhunga an member pariat boral te sunna hun an hmang a. General Secretary Pu K. Zoliana leh Pu Lalparmawia ten General Secretary Report leh Financial Report pe in hun an hmang bawk a ni.

Chawhnu lamah rorel inkhawm an hmang zui a, thil pawimawh hrang hrang an chhawpchhuah te an ngaituah ho bawk a ni.