Vawiin chawhma dar 11:00 khan Doctors seminar hall Civil Hospital Lunglei ah World Blood Doner Day hman a ni. Pu Lalduhthlanga Vice President AVDB in inkhawm kaihruaiin Pu S.Laldingliana, Parliamentary Secretary chu khuallian a ni.

Pu Dinga chuan thu sawiin Pi leh Pu te hunlai a Mizo te hi hnam huaisen thian chhan thih ngam kan ni a. Pi leh Pu te nun dan kal san in khawvel changkang leh hmasawnna kal zel ah Thisen pek hi thian chhan thihngam kan nihna a lang a ni. Kristianna nen pawh thisen pek hi a in hmeh hle a, nunna hlu tak chhan hi thil tha tih na tha tak a ni, a ti. Tanpui ngaite tanpui hi Pathian rawngbawlna tha tak a ni a, a bik takin damlo mangang te tanpui hi a hlu bik a ni. AVDB hnathawh hi hna ropui tak a ni, a ti. Thisen petu ten thisen pek a hlauh awm lohzia au chhuahpui turin a ngen bawk a ni.

Pu Vanlalnghaka, Asst. Drug Controller Lunglei, Secretary AVDB nibawk chuan report pein kumin chhung in tum 21 blood donation camp neih a ni a, kohhran hrang hrang te hnenah thisen pek that zia au chhuahpui turin a ngen nghal bawk a ni. Vawiin blood donation day ah hian chawimawi phute chawimawi na hun hman nghal ani a, Christian Hospital, Serkawn blood bank leh Civil Hospital, Lunglei blood bank te hnen ah chawimawina certificate khuallian hian a hlan bawk.

Mimal thisen pe tam mipa ah Pu Zosangzuala Serkawn in vawi 46 a pe a. Hmeichhia ah KC Lalthanzuali, Chanmari in Vawi 20 a pe bawk. Group ah Mualthuam ‘N’ TKP in Unit 60 pein Electric veng TKP ten unit 66 an pe a, TKP Chanmari in Unit 65 pein, NGO’s ah YMA Hnahthial Group in Unit 102 an pe a, YMA Electric veng branch in Unit 51 an pe a, Serkawn Branch YMA in Unit 72 an pe bawk. Zirna in ah NSS Unit Baptist Higher Secondary School in Unit 276, NSS Gov’t Higher Secondary School in Unit 195 Gov’t College NSS Unit Lunglei in Unit 140, Sipai ah 28 AR in Unit 89, 2nd Bn. MAP in Unit 61, 57 Bn. BSF in Unit 30 an pe bawk a ni.