Nimin (August ni 28, 2014) tlai khan ramchhung hmun dang rualin Acting Chief Minister Pu R. Lalzirliana chuan rampum mipui zawng zawngin bank account leh insurance an neih theihnana hmalakna thar “Pradhan Mantri Jan Dhan Yojana” (PMJDY) chu ATI Auditorium-ah a tlangzarh. He hunah hian Finance Minister Pu Lalsawta chu Khualzahawm a ni a. Minister Pu R. Romawia, Minister Pu H. Rohluna, Minister Pu P.C. Lalthanliana, Minister Dr. B.D. Chakma, Parliamentary Secretary Pu H. Zothangliana, Parliamentary Secretary Lt. Col. (Rtd.) Z.S. Zuala, Parliamentary Secretary Pu Hmingdailova Khiangte leh Parliamentary Secretary Pu K. Lalrinthanga te bakah Sorkar officer pawimawhte leh bank hrang hranga officer-te he hunah hian an tel a. He hawnna inkhawm hi Chief Secretary Pi L. Tochhong-in a kaihruai a ni.
Khuallian Pu R. Lalzirliana chuan Pradhan Mantri Jan Dhan Yojana chuan mipuite tan leh a bik takin mi harsa zualte tan tangkaina nasa tak a thlen a beisei thu a sawi a. Chutihrual chuan he hmalakna thar hi Mizoramah a hlawhtling dawn a nih chuan thil pawimawh dang hrang hrang a keng tel a. Inkalpawhna leh inbiakpawhna tha a ngaih thu sawiin, Pu Lalzirliana chuan BSNL hotute hnenah pawh thingtlanga inbiakpawhna tha zawk siam tura tan la turin thu a thlen tawh thu a sawi a. Bank hman tangkai chungchangah bank-a hnathawkte mizia leh tawngkamte a pawimawh hle thin a; a bik takin mi harsa ten bank dawr an inthlahrun loh nan hawihhawm taka thawktuten an lo dawnsawn thin a ngai a ni, a ti. PMJDY a hlawhtlin theih nan hian thahnemngai taka tang tlang turin Acting CM hian kalkhawmte chu a sawm a ni.
Minister Pu Lalsawta pawhin PMJDY chuan India ram mipuite tan hamthatna tha tak a thlen a beisei thu a sawi a. Miretheite pawisa puktir a, a pung tam tak phut thin a awm thu sawiin, chutiang harsatna a lo reh theih nan bank-te chuan awlsam zawka loan lian tham vaklo pawh pek theih dan tur ruahmanna an neih a tul thu leh, chung atan chuan PMJDY hi hmanraw tha tak a nih theih thu a sawi.
Pu Dipankar Purkayastha, General Manager, SBI Mumbai chuan he scheme chungchang hi sawifiahin, kumin Independence Day-a India Prime Minister-in thutiam a lo siam tawh tihhlawhtlinna a nih thu leh, nakum chhung chuan chhungtinin bank account pakhat tal an neih tawh a beisei thu a sawi.
PMJDY tlangzarhna lawm nan hian Khuallian chuan mi thenkhat hnenah Pass Book a sem a. Minister Pu Lalsawta chuan Corporate Social Responsibility (CSR) hmalakna hnuaia school panga thlante hnenah Water Purifier a hlan bawk.
Pradhan Mantri Jan Dhan Yojana hi rampumah a rualin tlangzarh a ni a. Sorkar laipuiin a phut angin state tinah State Level Bankers' Committee-in a programme hi an buatsaih a. District hrang hrangah pawh he scheme thar inhrilhhriatna hi tlangzarh a nih rual hian hman a ni bawk.
Pradhan Mantri Jan Dhan Yojana (PMDJY) hnuaiah hian bank kaltlanga hamthatna awm theite la hmu ve ngailo mi vbc 7.5 chuangte chu bank account an neih theih nan hmalak a ni dawn a. He scheme hnuaia account neite chuan cheng nuai 1 thleng anmahni leh an chhungte tan insurance a neih dawn bakah RuPay Debit Card an dawng dawn bawk a ni. PMDJY hi thawh hniha kalpui a ni dawn a, Phase I hian vawiin August 28, 2014 atanga nakum August 14, 2015 thleng awhin, hemi chhung hian account hawn leh a kaihhnawihte buaipui ani ang a, Phase II hian 2015 atanga 2018 thleng awhin, micro-insurance and pension scheme-te a thlurbing dawn a ni.
