Ram pum huap atana buatsaih chhungtinin bank account an neih theihna tur ‘Pradhan Mantra Jan Dhan Yojana’ chu nimin (28.8.2014) khan Mamit-ah pawh SBI Mamit branch buatsaihin ram chhung hmun dang rual a hawn a ni a, Mamit Bawrhsap Pu K.Lalthawmmawia’n a hawng.

Hawnna inkhawm Siamliana Hall a neihah hian Khuallian Pu K.Lalthawmmawia chuan bank account siam a harsat thin zia sawiin, tuna he scheme duan a ni ta chu lawmawm a tih thu a sawi a. Sorkarin scheme tha tak tak mipuite min duansak thin a, a hlawhtlinna chu mipuite kutah a awm a ni, a ti a. He scheme pawh hi hmang tangkaia hlawkpui ngei turin kalkhawm te a chah a ni.

‘Pradhan Mantri Jan Dhan Yojana’ hi kumin Independence Day a Prime Minister Narendra Modi thusawi bawhzui a duan niin, chhungkaw tinin bank account an neih theih nan leh hlawkna hrang hrang an neih theih nana duan a ni a. Duan dan chuan he scheme hnuaia account neitu a boralin Rs.1,00,000/- accident insurance lak theih tur a duan niin, overdraft Rs.5,000/- thleng phal a ni a. Account hawn nan hian sum sen a ngai lo a ni.

Nimin a hawnna inkhawm neihah hian Khuallian chuan he scheme hnuaia SBI bank account hawnsak tawh mi 193 hnenah bank passbook a hlan nghal a. Account hawnsak te hi JNV School , Mamit H/S II leh Govt. Mamit H.S.S zirlai naupang te an ni a. Hawnna Inkhawmah hian Pu P.C.Lalthanzuala, Chairman Jt.VC Mamit chu Khualzahawm a ni a, Sorkar official te’n he hun hi an hmanpui bawk.