Vawiin khan I&PR Conference Hall, Mamitah Ministry of Women and Child Development leh District Programe Office (Integrated Child Development Services) Mamit District buatsaihin  PMMVY Anniversary Week kharna hun hman a ni a. Dr. PC. Lalliannghaka, District Medical Superintendent, District Hospital, Mamit chuan khuallian niin he hun hi a hmanpui.

 Khualllian chuan thu sawiin vawiin hian India rampum Ministry of Women and Child Development a Secretary chuan Mizoram State hnenah North East Zone-a PMMVY Implement tha ber award a hlan chu lawmawm a tih thu sawiin kan Ram hian North East ah ber nihna kan ngah ve tawh hle a, NGO te leh Department hrang hrangte thawhhona that vang a ni a ti. India ram pum huap ang pawha Policy lian ber chu naupiang tur lo hmuah hi a nih thu sawiin Aspirational District kan nihnaah hmasawnna neih tak tak kan duh chuan thawktute mai bakah mipuite'n tihtur pawimawh tak kan nei ve a. Chu an mawhphurhna damdawi ina nau neih te, nu leh naute hriselna dinhmun Medical Check-up nei tura hrilh hriat leh nausen nu pum chhunga tha taka a seilen a, tha tak leh him dam taka a lo pian chhuah theih nan Anganwandi Workers kalkhawmte chu nasa lehzuala tan la turin a chah.

Mamit District Hospital chuan hmasawn zelin kawchhung enna khawl hrang hrangte pawh kan nei ve ta a. Naupai, a mamawh bikte tan kartin Ningani-ah Ultrasound a en thin an nih thu tarlangin amaherawhchu nau la piang lo chu mipa nge hmeichhia sawi thiang a nih loh thu sawiin Doctor hnenah pawh zawt lui lo turin mipuite a chah nghal a ni. 

PMMVY hi Ni 1.9.2017 a bul tan niin Ministry of Women and Child Development, Government of India atanga thuchhuah angin Ni 1-7 September, 2018 hian PMMVY Anniversary Week "Matru Vandana Saptah" hman a ni a. Hemi lawmna atan hetiang hian Theme chhawpchhuah a ni.

1. Raipuarte tan a chawlh hahdam leh ei tha a pawimawhna

2. Regular taka Ante Natal Check-up neih pawimawhna

3. Sorkar pawmpui Damdawiin a nau neih pawimawhna

4. Naute tana hridanna lak pawimawhna tih te hi a ni.

PMMVY Scheme hnuaiah hian nuin fa tir a pai leh a neih hun chhunga amah leh naute hriselna kawnga an lo inenkawl ve theih nan Rs. 5000/- tanpuina a dawn theih a. Mamit District chhungah he hamthatna dil hi 513 awm tawhin tun dinhmunah hian mi 479 in an dawng tawh a ni.

Vawiin Week kharna hunah hian PMMVY Scheme atana ICDS Project leh Anganwadi Centre thawk thate chawimawina hlan an ni a. Best Performing Project hi Zawlnuam ICDS Project in dawngin Best Performing Anganwadi Centre pakhatna hi Mamit Anganwadi Centre - 1 in an dawng a. Lawmman pahnihna hi Zamuang Anganwadi Centre -1 in dawngin pathumna hi Darlak Anganwadi Centre -2 in an dawng a ni.

PMMVY Week kharna hun hi Pi C. Lalrinpuii, District Programme Officer (ICDS) in kaihruaiin Mamit District chhunga ICDS Project CDPO te, Anganwadi Workers leh helper te, tlawmngai pawl leh khawtlang hruaitute bakah PMMVY beneficiary thenkhat te'n an hmanpui a ni.