Governor Pu Kummanam Rajasekharan chuan vawiin khan Mizoram Multi-Commodity Producers Cooperative Union (MULCO) hmunpui Thuampui leh College of Veterinary Sciences & Animal Husbandry, Central Agricultural University, Selesih te a tlawh a ni.

Pu Kummanam Rajasekharan chuan MULCO, Thuampui chu tlawh hmasa in, Managing Director Dr. Lalremliana leh a thawhpuiten an lo dawngsawng a. MULCO Plant-a procurement area, laboratory, processing unit leh packaging unit te an fangkual a ni. MULCO inzarpharh dan te, an siam chhuah zat te, chak la khawm tura an harsatnate leh hmasawn zel tura an harsatnate an sawi dun a. Governor pawh hian MULCO tihchangtlun kawnga puih theihna a neih chuan puih a inhuam thu a hrilh a ni.

Governor chuan College of Veterinary Sciences & Animal Husbandry (CVSc & AH), Central Agricultural University, Selesih chu tlawh leh in, CVSc & AH Dean Dr. Lalnuntluangi Hmar leh College of Horticulture, Thenzawl Dean Dr. H. Prasad te’n an lo dawngsawng a. Central Agricultural University, Selesih huamchhunga College of Horticulture, Thenzawl; Krishi Vigyan Kendra (KVK) leh CVSc & AH zirna inte an fangkual a ni.

Governor pual hian function buatsaih a ni a. Pu Kummanam Rajasekharan chuan thu sawiin, a hmunhma te chuan a rilru a khawih thu leh a lawmpui thu a sawi a. Mithiam rual kalkhawm te chu ram kal siamah hmun pawimawh tak an luah a ni, a ti a. Kuthnathawhtute thiamna tihpun kawngah an pawimawh thu sawiin, an thiamna leh kuthnathawktute thiamna te hmangin, India rama Mizoram dinhmun sang taka an hlankai theih thu a sawi a ni. An thawhrimnate chuan hun reiah Mizoram tan rah tha a la chhuah tur thu sawiin; Green, Clean, Bio leh Organic Mizoram a mitthla thu a sawi a ni. Thing leh mau humhalh a ngaihpawimawh thu a sawi bawk a ni.

Dr. Lalnuntluangi Hmar chuan an college in relbawl dan te, zirtirna an pek theih te, hlawhtlinna an hmuh tawh leh hmalakna hrang hrang ah presentation a pe a. KVK, CVSc & AH, Selesih te chuan theihai chi semna buatsaihin, Governor hian kuthanthawktu thenkhat hnenah theihai chi a sem a ni