Vawiin khan 1^st (Lushai Hill) Battalion, Assam Rifles, Lunglei te buatsaihin 1st AR Cinema Hall-ah Mizoram Youth Commission (MYC) kaltlanga thalai 115 rual sipai tan tum te tan inzirlawkna Pre Recruitment Training leh Screening Examination neih dan zirtirna neih a ni.

He hunah hian Capt. VK Davas, 1st AR chuan thuhma sawiin sipai tan tum te tan hian harsatna tam tak paltlang a ngaia, hetiang a hun tha kan buatsaih hi hmang tangkai a tha tak a zir a tling tling ngei tur a inbuatsaih turin kalkhawmte a chah a ni.

Pu Joseph Lalhimpuia, Chairman MYC chuan Col. Rathore, Commandant 1st AR leh a thawhpui te hmalakna a Pre Recruitment Training buatsaih a ni chu lawmawm a ti a. MYC chuan thalai te hmasawn nan theihtawpin hma a la zel a ni tiin inzirlawkna chu hmang tangkai theuh a, physical, medical leh written exam dan an zir te chu a takah paltlang ngei tum theuh thrin a chah a. Training ah kan kal tih hi duh tawk lovin, keimah hi ka pawimawh ani ti hriaa tling ngei tura ngawrh taka inpuahchah theuh turin a fuih a. Talent tam tak in nei a, huphurh lovin in theihna leh tumna te hmang tangkai a chhungte leh Mizoram tan mi tangkai ni turin tan la zel rawh u tiin MYC Chairman chuan a chah bawk.

Mizoram atangin sipai 300 vel lak ani dawn a, District hrang hrang ah MYC kaltlang in sipai tan tum thalai 700 rual vel an awm a ni. Vawiin Pre Recruitment Training ah hian thalai 115 an tel a ni.