No.4708/2020-2021

Dated Champhai, the 3rd September, 2020: India rama tribal te'n a kara sumdawng tlazep awm lova ramngaw hausakna atanga hlawkna an hmuh theihna kawnga tangkai tak tur, Sawrkar laipui Ministry of Tribal Affairs kaltlanga tribal-te dinhmun tihhmasawn leh hamthatna tura duan ‘Pradhan Mantri Van Dhan Mission’ kalpui dan tur chungchang relin District Level Coordination & Monitoring Committee chu vawiin khan Pu Mark Lalthanliana, Addl DC Champhai hovin DC Conference Hall-ah an thukhawm.

Pu Mark Lalthanliana chuan mipuite tana hmasawnna leh hamthatna tura tanpuina sumfai leh hmanraw hrang hrang district tana lo luanglut thinte tangkai zawk leh awmze nei thei ang bera hman anih theihna turin department hrang hrangte inzaitawna, mipuite rawngbawl nih inhriaa ngaihtuahna nasa zawka sen a tul thu a sawi a. Tualchhung siam chhuah ngei sumchang theite khawchhung mai nilo State pawn thlenga thawnchhuah theih tur khawpa chawikan leh siam that kawngah hmabak tam tak a la awm thu sawiin, Self Help Group member zinga vengva leh theihna nasa tak neite chu a bika training pek mai bakah hralhchhuahna dap thlenga puih an tul a ni, a ti a. Sawrkar atanga tanpuina lokal atanga hamthatna awm thei angahte a theih hram chuan hmeichhiate duhsaka ngaihpawimawh ni thin se a duhawm hle dawn a ni, a ti a. Champhai district-ah Van Dhan Mission hlawhtling taka kalpui anih theihna tura theihtawp chuah puiah member-te a sawm nghal bawk a ni.

He hunah hian Pu C. Lalbethlehema, ARCS Champhai leh Pu C.Vanlalhruaia, SICS, Nodal Officer, Van Dhan Mission Champhai district-te hnena atangin Jan Dhan Mission awmzia leh hmalak dan tur tlangpuite ngaihthlak a ni a. Champhai district atangin Van Dhan Mission kaltlanga hamthatna dawng tura thlan Champhai Town Multipurpose Co-operative Society (CTM-PACS) leh Hnahlan Grape Farming & Processing Cooperative Society Ltd. te hnen atangin Van Dhan Mission kaltlanga hmalak tum dante ngaihthlak a ni a. Champhai district tana Stage -1 kaltlanga sum dawn tur Rs 30,00,000/- hman dan turte sawiho niin, fund lokal hunah a hman dan tur ngaihtuaha thutkhawm leh nise tih a ni.

Van Dhan Mission hi ramngaw hausakna chhawr tangkai thei tura Tribal-te pianpui thiam finna leh kutthemthiamna neihte thiamna sang zawk nena kaikawp chunga sumpai dehchhuah leh eizawnna ngelnghet an neih theihna tura duan a ni a. A bul tan nan India ramah hemi Mission hmang hian tribal mi nuai 45 te eibar zawn leh nitin khawsak phung tih changtlun tum a ni a, ramngaw hausakna atanga Minor Forest Produces (MFP) lakkhawmna, sawngbawlna, training buatsaihna tur leh hralhna thlenga ngaihtuahna tur hmun Van Dhan Vikas Kendra (VDVK), SHG 15 te khaikhawm thei tur siam a ni ang a, a hralh leh buaipui ngaite Kendra-in a buaipui ang a, ruahman dan chuan kum tin VDVK 3000 siam tum niin, hnathawh that dan a zir ang zela siam belh leh tura ruahman a ni. Van Dhan Mission hnuaiah hian Aajeevika Mission (National Rural Livelihood Mission) leh DoNER hnuaia Self Help Group indin fel sa tawhte ngaihpawimawh hmasak tum an ni a. Hamthatna dawngtu tribal mi 20 te’n Self Help Group 1 zel siamin, SHG 15 te khaikhawmtu tur Kendra pakhat zel siam tum a ni.

Van Dhan Mission hi Mizoramah chuan Cooperation Department hmalakna kaltlanga kalpui mek a ni a. A bul tan nan Mizoramah Van Dhan Vikas Kendra 44 hnuaiah Van Dhan Self Help Group 663 siam a ni a. Hemi hnuaiah hian tribal hamthatna dawng thei tur mi 11,631 an awm thei dawn a ni. Mizoram Sawrkar leh Tribal Cooperative Marketing Federation of India (TRIFED) Ltd. chuan January Ni 23,2020 khan Van Dhan Mission hnuaia MFP-MSP Scheme kalpui anih theih nan thawhhona thuthlung an lo ziak fel tawh a ni.

Vawiin meeting-ah hian Pu R.Lalnghakliana PD DRDA, Pu Lalduhthlana DFO, Pu C.Lalbethlehema ARCS, Official dangte leh Champhai district atanga Van Dhan Mission hamthatna dawng tura thlan pahnih, Champhai Town Multi-purpose Cooperative Society (CTM-PACS) leh Hnahlan Grape Farming & Processing Cooperative Society Ltd. hotute an tel a ni.