India President Ram Nath Kovind chuan tukin zing khan Raj Bhavan tualzawlah zirlai naupangte kawmna hun a hmang a. Mizoram Governor Lt. Gen. Nirbhay Sharma leh School Education Minister Pu H. Rohluna ten he hunah hian President hi an tawiawm a ni.
President chuan zirlai naupangte chu an nu leh pa te tan mai bakah khawtlang leh ram nghahfak an nih thu a sawi a. Mizoram chu lehkhathiam tamna state a ni chuan hmasawnna duhawm a thlen chhoh zel a beisei thu sawiin, chumi atan chuan thangtharten mawhphurhna pawimawh tak an neih thu a sawi. President chuan Mizo society leh hmun dangah pawh zirna kawngah hmeichhiaten ber nihna an hauh chho ta zel chu lawmawm a tih thu leh, hmeichhiate hma an sawn chuan ramin hma an sawn tihna a nih thu a sawi a. Zirlaite chu hlawhtlinna an hmuh ngei a duhsak thu sawiin, an hlawhtlinna atana an zirtirtute pawimawh zia hre reng turin a chah a ni.
President nena inkawmna hunah hian School Govt. Mizo High School, Govt. Mizo Higher Secondary School, Synod Higher Secondary School, Govt. Mamawii Higher Secondary School, PC Girls' School, Govt. JL Higher Secondary School leh MICE atangin an vaiin zirlai 100 bawr vel an tel a. School Education Department atangin mi engemawzah an tel bawk.
Zirlai naupangte nena inkawmna hun hman zawh hian Prominent Citizens, NGO thenkhat aiawhte leh tunhnaia sports lama Mizoram tihmingthatute nen inkawmna hun President hian a hmang bawk a ni.
