Presidential Election 2012-a Returning Officer leh Rajya Sabha Secretary General ni bawk Pu V.K. Agnihotri chuan June ni 16 khan President thlan lo awm tur chungchanga hriattirna a chhuah a. He hriattirna ang chuan President inthlan atana candidate hming pe lut duh te chuan June ni 30, 2012 thleng hming an pe lut thei ang a. Hming pe lut te hi July ni 2 zing dar 11: 00 AM a endik a ni ang a. Candidate inhnukdawk duh te chuan July ni 4 tlai dar 3: 00 PM thleng an inhnukdawh phalsak an ni ang. President atan chhuhtu pakhat aia tam an awm chuan, vote thlak ni atan July ni 19( zing dar 10 : 00 AM atanga tlai dar 5 : 00 PM thleng) ruat a ni.

Tun tum President inthlan hi a vawi 14-na tur a ni a, kum 1952, 1957, 1962, 1967, 1969, 1974, 1977, 1982, 1987, 1992, 1997, 2002 leh 2007 te khan President inthlanna hi neih a lo ni tawh a. Tunah President ni lai mek term hi July ni 24, 2012 a tawp tur a ni. President inthlan a hian Lok Sabha leh Rajya Sabha MP te leh State Assembly tin te MLA ten vote an nei theuh a. Nominated MP te leh nominated MLA ten vote an nei ve lo thung. MP te vote hlutna zat hi a in tluk vek a; State hrang hrang chu a mihring cheng zat atanga chhut in an MLA te vote chu proportional representation hmanga chhut thin a nih avangin State hrang hrang MLA te vote erawh a in tluk lo thung. President inthlanna hi secret ballot in single transferable vote hmanga thlan a ni thin a.