3732/2023-2024

PRESS NOTE

1. Mizoram Universal Health Care System –

ABPM-JAY kan tih thin hnuaiah hian Health Insurance - Golden Card kan tih mai kha mi 5,19,150 in an nei mek a. Hei hian mipui a huam kim loh avangin Mipui zawng zawng huap tur – Mizoram Universal Health Coverage Scheme chu Sawrkarin a duang mek a. Official level meeting vawi 1 leh Inter-Ministerial Level Meeting vawi -1 kan neih tawh bakah kan Chief Minister kaihhruaina hnuaiah meeting vawi 1 neih leh tum mek a ni bawk.

Damlo ten anmahni pawisa seng lo a damdawiina an in enkawl theihna tur – Cashless system a kalpui a ni ang.

Hemi atan hian uluk takin sum hmuhna tur te, sum hman dan tur te, bill theih tur chin leh, rate bithliah tur hrang hrang te chu zirchian mek a ni.

2. Khum 100 awm theihna tur Kulikawn Hospital -

Aizawl khawpui laili taka awm Aizawl Civil Hospital lun lutuk leh a hmunhma chep lutuk chhawk zangkhai na turin khum 100 awm theihna damdawiin – Aizawl Civil Hospital Annex chu Kulikawn Hospital Complex ah siam tum a ni a. Rs 89.68 Crores estimate chu State Level Executive Committee in min pawmpui tawh a.

Ni 3.2.2024 (Saturday) khan Kan Chief Minister ho in Planning Department lam hotute, PWD lam hotute leh Health Department lam hotute nen a hmunah kan enho nghe nghe a ni.

3. CM’s Special Package for Zoram Medical College (ZMC) –

Zoram Medical College enkawlna senso hi a hautak em avangin leh tun hnaiah inspection kan neih mai a rinawm avangin sum lamah harsatna kan tawk mek a.

Kan harsatna te hria in kan Chief Minister Pu Lalduhoma chuan immediate relief atan Rs 1.4 Crores min ruahman sak a. Hei hian inspection kan neih dawn avanga harsatna zualpui min phuhruk kan beisei a. Kan Chief Minister chungah pawh lawmthu ka sawi a ni.

4. Zoram Medical College (ZMC) chungchang –

Zoram Medical College hi Central sawrkar kuta hlan mai hi a tha khawp mai a. Hemi chungchang hi ni 17.1.2024 khan Union Health Minister ka sawipui a, ani chuan theihtawp a min tanpui lo inhuam in, state sawrkarin tha zawka a kalpui theihna tur atan a bik taka tanpuina “Special Grant” min pek a tum thu min lo hrilh a.

Special Package tur atana project proposal chu siam fel anih veleh Delhi lamah kan chhukpui nghal a. Parliament Session buai tak karah Union Health Minister – Pu Masukh Mandaviya in hun remchang min lo siamsak in, Ni 6.2.2024 khan ZMC tih changtlunna tur proposal chu kan thehlut fel a. Inthlan hma ngeia 1^st installment tal min pek chhuah hman a tum thu a lo sawi a. Kan lawm hle a ni.

5. Tertiary Health Sector :

Mizoram hian rural areas a Primary Health sector tih changtlun tumin kum rei tak chhung chu nasa takin hma a lo la tawh a.

Mahse, mipuite insenso tamna ber leh state pawn lama kan ram sum luan chhuah hnemna ber pakhat chu Tertiary Health sector lam – Kal thlak, Lung thlak, cancer enkawl etc te hi an ni awm e.

Phai damdawiin lian zawkte khawl neih ang kan han nei chho ve tan a, kan doctor te pawh in phai damdawiin changtlung zawka tih theih ang kha an lo ti thei ve reng mai a.

Hetiang lama hmasawnna nei tur hian ruahmanna kan siam mek a, nakin lawkah chuan kal thlak, lung zai etc hi chu kan mizo doctor thiam ten kan sawrkar damdawiin ngeiah an tih theih thuai ka beisei.

Tin, a bik takin Cancer Hospital, Zemabawk ah sawn cancer zai theihna bungrua leh doctor a awmfel vek a, hnimhlum petu tur doctor, Nurse leh puitu dang tur atan post creation sawrkarin min phalsak chiah bawk a.

Tun financial year chhung ngeiin post fill up phalna nei a, Cancer Hospital a cancer zaina bul tan theih kan tum a ni.

6. District Hospital 10-ah Laboratory changtlung –

National Health Mission hnuai atangin District Hospital 10-ah thisen/zun etc test-na Laboratory changtlung tak din tuma hmalak mek a ni a. A thawhkhatna atan district pathum – Siaha, Hnahthial leh Champhai ah te hmalak hmasak mek a ni.

7. Block Public Health Unit (BPHU) –

Tunlai ah chuan laboratory hi damlo dinhmun zir chianna hmasa ber anih avangin National Health Mission hnuaiah tho CHC/PHC -21 nos ah Block Public Health Unit anga laboratory din tura hmalak a ni bawk a. Tunah hian Block 7 - Ngopa CHC, Vairengte CHC, Kawrthah CHC, Chawngte CHC, Thenzawl CHC, Cherhlun PHC leh Tuipang PHC) chu hawn theih maia peih tawh an ni.

8. Thawktu indaihlohna chungchang –

SEDP hnuaia lak Nurse/Health Worker te chu rawih chhunzawmna tur sum a awm tak loh avangin chawlhtir an ni a. Hemi avanga Health Sector awngrawp palh thei venna turin thawktu awmsa semrual tura hmalak a ni a. Department lama hotuten zirchianna an nei mek a.

Tin, thawktu indaihloh zualna phuhruk tur pawhin zirchian mek a ni a. Nurse 143 lak belh tumna chu Sawrkarah thlen a ni mek a. Loh theih loha thawktu lak belh ngai zat hi thawktu dangah pawh chhut chuah anih hunah Sawrkarah thlen leh a ni ang.

9. Ruihhlo Do –

Tunah hian Ruihhlo in kan ram leh hnam hi a run mek a, kan Chief Minister Pu Lalduhoma “100 Days Programme” ah pawh “Ruihhlo Dona” kawnga hmalak nghal a tul zia tarlan a ni.

Kan CM zahawm tak “100 Days Programme” hi tih hlawhtlin anih theih nan keini pawh-in ka Department chan pakhat “Social Welfare & Tribal Affairs Department” hnuaiah hma la nghal in, Mizoram chhunga Kohhran Hmeichhe pawl hrang hrang leh NGO hrang hrangte sawmin,

Ruihhlo Dona kawnga hmalak dan tur “Consultative Meeting” hlawkthlak tak mai kan nei a.

Kan ramah ruihhlo in bu a khuar ngheh tawh em avang hian min dopui turin kan chanchinbu mite hi ka sawm che u a, chu mai bakah mipui ten nasa zawka tan kan lak tlan theihna tura, mipui hnena nasa zawka awareness min siam pui turin ka sawm nghal bawk che u a ni.

Kei ngei pawh hi tun Press Conference zawh veleh hian Lai Ram Isua Krista Kohhran Hmeichhe Pawl (LIKBKHP) Inkhawmpui Lian, Sangau a neihna ah Ruihhlo Do Awareness kalpui turin ka chhuak veleh nghal dawn a ni.

10. Thlai thar lei –

Zoram Peoples Movement (ZPM) Policy lian ber – Thlai thar lei ti hlawhtling turin ka Department chan – Women & Child Development Department hnuaiah hma lak ka tum a.

Baktawng, Khumtung etc a balhla chingtu te, hmun hrang hranga Sapthei chingtu te, Dragon Fruit thartu te chu society anga din tirin, Sawrkar nena inremna fel tak neiin Mizoram puma Anganwadi Centre hrang hranga naupang te tan mizo thar chhuah eitur tha kan sem theih nan hma kan lak kan tum a.

Hemi atan hian tunah chuan Guidelines tur te kan duang mek a ni.

Tin, ni 5^th February, 2024 khan Pi Smriti Irani, Union Minister, Women & Child Development nen Delhi ah inkawmna hun tha tak mai kan nei thei a. Anganwadi Centre 510 sak thatna tur chungchang te kan sawi dun a ni.

11. Ruang phurh –

Mizote hi khawpui zawk leh khaw dang dangah kan lo in zarpharh ve nasa ta hle a. Chhiat kan lo tawh hian mahni inlum ah ngei ruang thlenpui kan duh thin avangin Sawrkar tha chakna hmanga mipui duhdan tih hlawhtlin hi tha kan ti a.

Ruang phurhna tur hian thil tul leh ngaihtuah tur tam tak a awm a, a kalphung tur Guidelines kan duang mek a, A senso tur sum pawh tun budget session a pass theih turin dah kan tum a ni.

12. Tourism lama hmalakna hmasa –

Mizoram hian tourism lama potential a neih that dan kan hre tlang theuh a, mahse awareness leh advertisement tereuh te te ah kan la kalral rih mai mai ni te pawhin a hriat theih.

• A hmasa berah chuan Community based rural tourism hi ngaih pawimawh kan tum a. Thingtlang mite, tourism service providers te, tourism entrepreneurs te’n-a tourism development atanga hmasawnna, ei leh bar kawng-a ngel nghehna an neih theih zelna turin kan nunphung phochhuah te, kan ram mawina phochhuah te leh kan ram chhung-a adventure tourism activity hrang hrang te phochhuah hi kan tum a ni. Hengah hian local community, thingtlang mipuite chu a tir atanga tel tir ve zel kan tum a, awareness neih bakah hand holding neih pui zel pawh kan tum a ni.
• Pahnih naah chuan Tourism Village atan pilot phase atan khaw pali/panga thlan chhuah a, SWOT analysis nen-a tourism lam-a hma an sawn theihna tura hmalak pui kan tum a ni.
• Pathum naah chuan tunhma-a kan la tih ngai loh, Event Calendar mumal tak siam a, Mizoram chhung-a Tour Operator emaw Mizoram pawn lam atang- a Tour Operator te’n kan event leh festival te plan mumal tak nei-a an hralh theihna turin tunah hian ruahmanna kalpui mek a ni.
• Mizoram Tourism hian Airport-ah Greeter, ram pawn atanga mikhual lo kal te ILP leh a tul dang lo buaipui tur dah tum-in hma kan la mek a. Greeter te hian Mizo thuam famkim nen, Lengpui Airport ah mikhual te an lo pui thin dawn a ni. Hnamdang leh rampawn atanga zin mi lo kal te an tlang nel phah ngeiin kan ring.
• Tin, Department chuan stakeholders te pawimawh zia hria-in, a tam thei ang ber consultative meeting leh interactive meeting neih kan tum a. Stakeholders te kan facilitate loh chuan Tourism hian hma a sawn thei ngai dawn lo a, Stakeholder-ten Sawrkar hmalakna an lo hriat ve zel khan phur- na leh chona a siam dawn a, chuvangin hetiang lamah hian nasa lehzual a ke pen kan tum mek a ni.
• Training & Capacity Building chungchang hi a pawimawh zia kan hriat thar leh fo hi a ngai tak zet a. Hei chu kan party Manifesto ‘ Hand Holding Policy’ te-nen pawh a in zul viau in ka hria. Hetiang tur hian kumthar atang chuan Department pawhin hma nasa lehzualin thingtlang-a tourism potential nei te khuaah hma lak kan tum ruh em em a ni.
• Hei bakah hian Mizoram chhung-a hotel, homestay, restaurants hrang hrang-te uluk leh zuala monitoring kan tih hi a ngaiin ka hria a. Hemi atan hian Department atangin regular tak-a Inspection neih a tul dawn a. Mipui te tawiawmna pawh kan mamawh hle dawn a, kan ei leh in siam dan te’n food safety standard norm a pha em tih thlengin endik hna hi kalpui kan tum a ni. Hemi atan hian Budget ah pawh sum tam zawk dah a ni.
• Tin, Tourist infrastructure kan neisa te dinhmun hi kan zirchiang mek a, kan khawchhuah pui theih loh tur infrastructure te hi chu privatise mai a that zawk leh zawk loh kan zir chiang mek bawk.

13. Unity Mall –

State hrang hrang ten an state thil siam an rawn zawrh a, One District one Product (ODOP) hnuaia thil tharchhuah ten market an neih ve theih nan te, district hrang hrangten an mahni pual stall/emporium an neih ve theihna turin Mall lian tak – ‘Unity Mall’ hi State hrang hrangah din tum a ni a.

Tourism Department, Mizoram pawhin project proposal te siamin, Central Sawrkarin Rs 127 Crores allocation pawh min pe tawh a, reilo te ah DPR min approve mai kan beisei a.