3731/2023-2024

Dated Siaha 8th February, 2024: Vawiin chawhma dar 11 khan Pi Lalnunmawii Returning Officer, 40-Palak Assembly Constitency, chuan DC Mini Conference Room-ah ni 1, January, 2024 tehfung a hmanga duan 'Special Summary Revision of Final Photo Electoral Roll 2024' chu a tlangzarh.

Pi Lalnunmawii chuan Election Officer leh a thawhpuite inpekna leh thawhrimna fakawm a tih thu sawiin, political party leh NGO- aiawh lo kalte chungah lawmthu a sawi a. Mipuiten an aiawh an thlanchhuah theihna turin kum 18 tling tawh ten vote neih hlutzia hrehtiam se a duh hle tih tarlangin, vote nei tawhte pawhin vote thlak ngaipawimawh chhunzawm zel turin a chah a. India khua leh tui diktak chauhin vote an neih theih nan fimkhur a tul hle tih tarlangin, Election Official-te kutah engkim dah lo a, political party leh NGO- te nen thawhhona tha tak a awm tul a ti. A bik takin thingtlang lama NGO- te chu 'Election hearing' neihnaah telpui tha turin a sawm bawk.

Pi Lalnunmawii chuan 'document' diklo pekchhuah avanga hmun khat aia tama vote nei leh India khua leh tui diktak ni lo vote lo nei mai sawi tur an awm leh thin chu pawi a tih thu tarlangin, document -pe chhuak tute fimkhur zual turin a chah a. Khawtlang hruaitute leh Political Party lam pawh hemi kawnga nasa zawk a tan lo la tur leh a tul anga Election Official-te lo finchhuah zel turin a sawm a ni.

Pu Vanlalchhuanliana, Election Officer, chuan report tawi pekna neiin nikum December ni 20 atang khan revision neih tan nghal a ni, a ti a. January ni 6, 2024 khan Draft Electoral Roll- tlangzarh tawh niin siamthat ngai, thun belh leh paih ngai ang angte chu January ni 22 thleng khan tihfel a lo nitawh a ti. Kum 25 piahlam tan Electoral Roll- a inthun a har tawh thin tiin Pu Vanlalchhuanliana chuan kum 18 -22 an nih chhunga Electoral roll- a hming chuang hman ngei tura tan la turin mipuite a sawm a, political party- ten theihtawp lo chhuahpui turin a ngen bawk.

Vawiina tlangzarh tak Special Summary Revision of Final Photo Electoral Roll 2024- ah hian 39-Saiha (ST) A/C-ah vote nei mipa- 11578 leh hmeichhia-12666 awmin a vaiin vote nei mi- 24244 an awm a. 40-Palak (ST) A/C- ah vote nei mipa- 10128 leh hmeichhia- 10339 awmin a vaiin vote nei mi-20467 an awm bawk a. Siaha District chhunga vote nei zawng zawng chu mi- 44711 niin, mipa- 21706 leh hmeichhia- 23005 an ni.

Vawiina 'Special Summary Revision of Final Photo Electoral Roll 2024' tlangzarh tak hi Political party aiawh lo kalkhawmte hnenah Copy khat theuh (Hard leh Soft copy) Pi Lalnunmawii chuan a hlan nghal a ni.