Information & Communication Technology(ICT) department leh Mizoram Journalists Association (MJA) te buatsaihin sorkar rorelna dik atan e-governace pawimawhna zirhona, “Seminar on good governance”chu vawiin khan NLUP Implementing Board conference hall-ah neih a ni a. Pu Lal Thanzara, Minister of state for ICT chu khuallian a ni.

ICT department leh MJA tang dun hmalakna in  e-governance chungchang zirhona seminar hi February thla atang khan district khawpui 7 ah te neih a ni tawh a. A hnung kharna seminar vawiina neihah Khuallian Pu Lal Thanzara chuan “Rorelna dik” chu tuna Mizoram sorkar innghahna thupui a ni tih sawiin tun sorkar rorelna hnuaia mipui ten an chanvo dik tak an chan theihna tura kawng hrang hranga sorkar hmalakna te a tarlang a. ICT hmalakna bikah chuan khawpui leh thingtlang kilkhawr zawka cheng ten awlsam zawk a sorkar an dawr theihna turin Common Servie Centre, Public Information Kiosk leh Rural Information Kiosk  thahnem tak din a ni tawh a. State Data Centre chu peih thawkhat a ni tawh bawk a. Mizoram sorkar inrelbawlna siam thatna tura Mizoram Administrative Reform process atan leh rang taka mipuite mamawh sorkarin a chhan theihna hmanrua atana Service Delivery Mechanism buatsaih nan World bank atangin funding hmuh a nih tur thu pawh a tarlang bawk. 

Pu Lal Thanzara chuan ramin hma a sawn rualin mipui ten sorkar ah phut an ngah tial tial a. An dikna leh chanvo au chhuahpui nachang an hre deuh deuh chu thil lawmawm tak a ni, a ti a. Hemi rual hian rorelna dik leh tha nei turin ram hruaitu te bakah mipui pawhin an mawhphurhna an hriat ve a pawimawh hle a ni, a ti a. Sorkar-in a hmalakna turah fimkhur tak leh ngaihtuahna tam tak senga thutlukna a siam te mipuiin an zah thiam a, sorkar hmalakna te a hlawhtlin theihna tura an mawhphurhna an hlen ve a tul a ni, a ti a. Rorelna dik leh tha a awm theih nan sorkar leh mipui inkara hmun awl hnawhkhat turin media lama thawkte chu an pawimawh hle a ni, a ti a. Hemi atana MJA ten good governance chungchang zirna an nei chu lawmawm a tih thu sawiin Pu Lal Thanzara chuan hlemhletna do tura sorkar hmalakna ah pawh media a thawkte chu  sorkar puibawm a,  an ke pen khalh ngil turin a sawm bawk a ni.

Seminar ah hian Pu Lalthlamuana, Chief Informatics Officer, ICT chuan “good governance through e-governance”  tih thupui hmangin rorelna dik leh tha nei tura e-governance pawimawhna leh hemi atana ICT hmalakna te, a hmachhawp hrang hrang te nen a sawifiah a. Ram rorelna tha nei tura sorkar leh mipui mawhphurhna  neih ve ve te, sorkar thutlukna ah mipui an tel ve a pawimawh zia te,  sorkar leh mipui inkarah inpawhna leh thu inngaih chan tawn a tulna te, thingtlang hmun kilkhawr bera awmte tan sorkar dawrna kawng awlsam leh hautak lo zawk buatsaih sak a tul zia te a tarlang a. Zawhna leh chhanna hun ah kalkhawm ten zau takin sawihona an nei zui a ni.

Vawiina Seminar ah hian nikum December ni 7 a boral, Pu K.Lalrochana, Lamtluang chanchinbu Editor, Lunglei chhungte hnenah Minister chuan MJA welfare fund atangin cheng nuai 1 ralna thilpek a hlan a. Seminar hi MJA President Pu C.Lalrambuatsaiha’n a kaihruai a. National Institute of Electronic & IT atangin Pu N.B.Singh, Director, NIELIT leh officer dangte bakah MJA member thahnem tak an tel a. Pu Vanlalrema Vantawl, Vice President MJA Gen. Hqrs in lawmthu sawiin hun hnung a khar thung a ni.