Vawiin chhun dar 12 khan Pu L.Thangmawia, Vice Chairman, Human Resources Development Board chuan chanchinbu mite kawmna a nei a, hetiang hian Press Statement a chhuah a ni.

Federation of Mizoram Samagra (RMSA & SSA) Employees ( FEMSE)-ten nithum chhung (21, 22 leh 25 November, 2019) chawlh an la thut hian sorkar a barakhaih takzet a. An chawlh chhan hi  FEMSE atang hian Ministry chuan vawiin ni thlengin official-in engmah a la dawng lo a ni.

FEMSE member-te hi Primary School zirtirtu - 550, Middle School zirtirtu – 1643 lai an nih  bakah, High School - 93 leh HSS - 6-ah an thawk mek bawk a.  Tunlai hian sikul hrang hrangah exam neih mek leh neih hmabak a nih avangin zirlaite tan a pawi hle dawn a ni.

SSA leh RMSA-te Samagra Shiksha-a chhunfin anih hnu hian thawktute hlawh central lam hian a hma aiin a rawn ti hniam a. Matching share 10% bakah a hmaa an hlawh zat an lak theihnan kum khat zelah Mizoram sawrkar chuan cheng vaibelchhe 27 a sen belh mek a ni. Mahse Finance changtu kan Chief Minister Pu Zoramthanga’n Education a ngaih pawimawh avang leh Education changtu Minister  Pu Lalchhandama Ralte-in theihtawp a chhuah zarah central lamin sum an rawn pek tlai tum pawhin  advance allocation-te siamin Mizoram sawrkar suma hlawh an lo lak theihna turin hma laksak an ni zawk thin a ni.

Tunah hian naupangte exam lai mek leh exam tan leh mai tur an ni a. Hetiang hun khirkhan lai tak remchanga hmanga naupangte hmakhua tihchhiat pawh pawisa lova lungawilohna an lantir hi sorkar tan pawmzam theih a ni lo a ni. Chuvang chuan FEMSE hruaituten nawrh an huaihawt mekah hian sawrkar chuan “NO WORK NO PAY” a kalpui dawn a.  Sikul lam thuneitute hnenah pawh zirtirtu kal leh kal lo nitina report tura hriattir an ni.

FEMSE hian Mizoram sorkara an thil phutte School Education Department changtu Minister-ah emaw, Chief Minister hnenah emaw an la thlen lo va. Thlen pawh nise tun dinhmunah SSA (Elementary)-te hian Mizoram sorkar chu an service chungchangah Guwahati High Court Aizawl Bench-ah an khing mek lai a ni a [WP(C) No. 128 of 2019]. Court thu kal lai a nih avang hian court-in a rel fel hma chuan an chungchang thua hmalakna kal mek pawh sawrkar tan thutlukna engmah siam theih a ni rih lo a ni.
 
Samagra Shiksha hnuaia thawktute tuna an dinhmun aia ziaawm deuha siamthat pawh sorkarin a duh a, ngaihtuahna pawh a hmang mek a ni. Amaherawhchu,  sorkar thar kum khat pawh la tling lo hian thiltih a duhte leh dinhmun siamthat a duhte hi chuti rum rumin a tifel nghal vek thei lo a. Anni chungchangah pawh tihthut mai theih loh, hun rei deuh ngai chi a ni a. Sorkar dinhmun hrethiama lungawi lohna an neih mekte an tihtawp hi sorkar chuan a duh a, a beisei bawk a ni.

Sawrkar chuan zirlai pawisawilote hmakhua ngaiin FEMSE-ten nawrhna an kalpui mek hi titawp se a duh takzet a; Ni  25th November, 2019 (Thawhtanni) atang hian an hna chhunzawm vek turin zirtirtu zawng zawngte a hriattir a. Sawrkar hriattirna zawm lote chungah a tul ang zelin action a la dawn a ni tih kan inhriattir nghal a ni.