Nimin khan Lunglei DC Pi K. Lalrinzuali kaihhruaiin a office chamber-ah Lunglei District chhunga naupang kum 1 hnuailam thi (Infant Death) chungchang thlirletna ‘Infant Death Review Meeting’ neih a ni. He hunah hian Lunglei CMO Dr Thani Pachuau, Medical Superintendent DR SR Ngurchamliana leh Health Department hnathawkte, Line Department-te leh NGO hruaitute an tel.

He thlirletna hun ah hian midangte tana malsawmna ni thei turin naupang thi pahnih (2) te Nu leh Pa leh enkawltu doctor ten an damloh dan tlangpui leh an enkawl dan te, Doctor leh Nurse-ten anlo buaipui dan leh eng vanga thi nge an nih sawihona hun hman a ni a.  Lunglei DC Pi K. Lalrinzuali chuan naupang nu leh pa te a tawrhpui takzet thu sawiin Reviw Meeting-ah huaisen taka an rawn kal theih avangin an chungah lawmthu a sawi a. Naupang nu leh pa te hian an fate boral chungchangah leh damdawiina enkawlna an dawnah lungawilohna thlen tur an neih loh thu an tarlang.

Meeting-ah hian naupang thi an tlem theih nan tan lak a ngaih thu tarlan a ni a. Nu nau pai ten doctor rawn peih a pawimawh thu leh an ei leh in an fimkhur a tul thu tarlan a ni a. Sawrkar programme te hi mipui in hmang tangkai turin meeting chuan a ngen a ni. Kan lo hrisel zawk nan Health Department chauh ni lovin Line Department leh NGO te nen a thawhhona tha tak neih a pawimawh thu sawi lan a ni. Tin, Veng/khua thenkhat ah ASHA indaihlohna a nasa tih meeting ah hian tarlan niin a bik takin veng lian zawkah te ASHA dah belh tura hmalak ni se tih Committee chuan a rel a. Health Department kaltlanga hri danna (vaccination) pek chhuah thin te chhungkaw tinin ngai pawimawha a hun taka la ngei turin Committee chuan mipuite a ngen bawk.

Health & Family Welfare Department-in a record danin kumin sawrkar kum April 2019 atanga September 2019 thleng khan Lunglei District ah Infant Death (naupang kum khat hnuai lam thi) 17 (Mipa -11 leh hmeichhia - 6) an awm tawh a ni.