Vawiin chawhma khan Rashtrapati Bhavan, New Delhi-ah Conference of Governors vawi 50-na chu President Ram Nath Kovind chuan a hawng a. Session hrang hrang neih chhungzawm nghal a ni a. Heng session zinga pakhat, Parallel Session for Breakaway Group 'A' - Tribal Issues-ah Governor P.S. Sreedharan Pillai chuan Tribal te harsatna tawh hrang hrang te sawiin Tribal te dinhmun chawikanna atan rawtna a thlen a ni.

State Governor, Lt Governor , Union Minister  leh India rama Official pawimawh kalkhawmte hmaah Pu P.S. Sreedharan Pillai chuan thusawina hun a hmang a. Mizoram dinhmun te sawi hmasain Mizoram chu state pakhat chhunga mipui cheng awm zat teha Tribal awm tam na ber a ni a. Mizoram mipui 94.4% chu Scheduled Tribe(ST) an ni a ti.  Central Sawrkar leh Mizoram sawrkar hmalaknain Tribal te hamthatna tur hrang hrang kalpui mek a nih rualin hmalakna tur tam tak a awm a ni a ti a. A dan tlang puiin Tribal te chenna chu hmun kilkhawr zawk leh tlangram, inkalpawhna pawh bakah inbiak pawhna te pawh a that lohna hmun te a ni tlangpui a. Hei vang hian tribal te hian  damloh thu hlaah harsatna lian tak an tawk mek a. Tribal te harsatna tawh mek te sutkian a nih theihnan  Central sawrkarin ruahmanna thar a siam belh a ngai a ni a ti.

Tribal te pualin Art leh Film festival buatsaih sak a pawimawh thu sawiin hei hian ram inpumkhatna kawngah pawh rah tha a chhuah ngei a beisei tih a sawi a. Hnam lian zawk ten Tribal te an chimral lohna tura Tribal te nih phung leh nunphung vawnhimsak kawngah chak zawka  a ngai a. Mizoramah pawh Mizote, Reang leh Chakma te pualin Kut te buatsaih thin a nih thu sawiin a tangkai hle a. Hetiang ang zawnga Tribal te nihphung leh nunphung tarlanna programme tam zawk te pawh Central sawrkarin rawn siam belh se a lawmawm hle ang a ti.  Mizoram chhunga pawl hniam zawk zirna sikul te a awm tam rualin pawl sang zawk zirna erawh school Central sawrkarin a dinbelh a tul hle a ngai a. CBSE sikul tam zawk Mizoramah din anih theih nan hmalak a ngai a. Thingtlang khawlian deuhah College awmnaah te phei chuan Tribal te puala College Hostel din a ngai a ni a ti. Sum deh chhuah kawngah Mizoram tan bik chuan Handloom and Handicrafts a pawimawh zual tih a sawi a. Heng Mizo kutchhuak te awlsam zawka hralh a nih theih nan Dillu Haat, Delhi a mi ang deuh, Emporium tam zawk India ram khawpui lian deuhah te Central sawrkarin a buatsaih sak a ngai a ni a ti.

Mizoram chhunga sumchang thei thil tam tham ber chu Mau(Bamboo) a ni tih a sawi a. Mau hmanga eizawnna siam kawngah Mizoram Sawrkar chuan chak takin hma a la mek a. Hemi kawngah hian Central Sawrkar puihna lian tham zawk mamawh a ni a ti a. Mizoramin a mamawh dang pawimawh em em chu Health Care system tih changtlun a ni a ti a. Damdawiin changtlung zawk, tunlai thiamna hmanga siam damlo enkawlna khawl changkang zawk te state mipuiin an mamawh em em laiin a la tlem hle a. Damlo enkawlna khawl changkang  tam zawk Mizoramah mamawh a nih bakah inkalpawhna kawngpui tam zawk siam a la ngai a. Tun dinhmunah chuan thih leh dam kara hmanhmawh taka Damdawi In pan a tul changin harsatna lian tak damlo ten an tawk mek a ni a ti.

Parallel Session for Breakaway Group 'A' - Tribal Issues session hi Pi Droupadi Murmu, Governor of Jharkhand in a kaihruai a. He hunah hian Pu Arjun Munda, Minister of Tribal Affairs leh Ministry of Tribal Affairs atangin Official pawimawh te an tel a ni.