Vawiin khan zan 5 riaka Meghalaya State tlawh tu MJA member 9, an hruaitu MIS Officer 2 Malsawmsanga leh Paul Rokima leh Shillong Mizoram House ARC Joseph Lalchhuanawma te chuan Meghalaya Chief Minister Pu Conrad K Sangma chu a chenna Bangla, Polo vengah an kawm.

Mizoram sawrkar tirh a kal Press Tour member te te chu Team Leader Pu Malsawmsanga, PRO to Governor, Deputy Team Leader Paul Rokima, DIPRO, Mamit, K Thangvela - Zobawm, Tuipang (Editor)
Lalhmunzauva - Tawrhbawm (Editor)
Lalramdinsanga - The Zozam Times (News Editor)
Lalhunmawia - Zawlbuk (News Editor)
Lalchhuanawma - Daily Post Lunglei
Lalthlamuani Ralte - Si Ar, Khawzawl (Editor)
Lalremruata Khiangte - Kawrthah Post
R Lalmuansanga - Serkhawpui, Serchhip (Joint Editor) leh
Lalengkima Colney - Rengkhawpui, Vairengte (Editor) ten an ni.

Meghalaya CM kawmna hunah hian Mizoram Journalist te hi ARC Pu Joseph Lalchhuanawma leh Dr Lalrintluanga Jahau, Pu Conrad K Sangma thiantha ten an tawiawm a. Pu Conrad-a hnenah hian Mizoram Chanchinbumite chuan Mizoram Sawkar Diary, Sawrkar Calendar, MLA te hlimthla tarlanna -Choice of the People bakah Mizo Ipte Chei te an  pe a ni. Team Leader Pu Malsawmsangan sawrkar tirha press tour neih a nihdan leh an thilhmuh te a sawi hmasa. Pu Conrada chuan Mizoram Journalist ten Meghalaya Eco-Tourism Model thenkhat an rawn tlawh avanga lawmawm a tih thu a sawi a. Mizoram chu rammawi tak khualzinmite tlawhduh tak tur nia a hriat thu a sawi a ni. Pu Conrad K Sangma chuan Tourism kawnga  Meghalaya a hlawhtlin chhan nia a ngaih te sawiin an hlawhtlinna chu Hmarchhak mite tan thil chhuanawm tak a ni a ti. Tourism chungchangah sawrkar che hmasa lovin mipuiin hma an hruaia; sawrkar puihtlak khawpa hma an lak hnuah sawrkar chu a che chhuak thin tih a sawi a.Tourism huangah Meghalaya Chief Minister Pu Conrad Sangma chuan Rs 35 Crore sengin nasa zawkin hma a la tih a sawi a ni. "Mipuiin anmahni in hma an la anga, sawrkar chuan Tourism thil - building emaw infrastructure lam a khawih dawn lova mimal hmalaknaah a dah anga, tanpui an ngaih chuan kan pui ang", a ti. Tunah hian state te leh state lian hmasawnna huangah thawhhona Meghalayachuan a kalpui mek a. State hmasawn tak - IT company leh khawvela company lar awm tamna Telegana state nen thawhhona an ziak fel tawh a. Beiseina an nei sang hle tih a sawi bawk a ni.

Press Tour a kal Jounalist te hian nimin nileng khang Meghalaya state thlanglam an fang a. He hunah hian Asia rama khawfai bera Media thenkhat ten an chhal mek, Mawlynnong Village leh Bangladesh ramri a Border Trade kalpuina, Dawki Village an tlawh bawk a ni. Mawlynnong-ah hian mihring 500 vel bawr an cheng a, han thlir thuak chuan Mizorama khawfai ber Biate khua leh Reiek Tlang thuta Ailawng khuate aia a lan faina a tam lo hle a ni . An khua hi a fai bakah an khaw ramchhunga Thingzung Lei( Living Root Bridge) avangin khualzin tlawhtu nitin zarual an awm ziah a. Mawlynnong khawchhunga lirthei nikhat hun man hi Rs 250 atangin a in tan a; lirthei hunman atang ringawt pawh sum an lalut hnem thawkhat hle a ni.

Dawki khuaah hian Mizoram Journalist te chuan Pu GV Krishna Rao, Chief Commisioner, GST, Central Excise and Custom,  Guwahati Zone leh Custom Official te kawmin Mizoram chhim lamah ICP din tura hmalak mek a nih thu te sawiin border trade chungchanga thil pawimawh te an zawt bawk a ni. Dawki khaw bula Lui fim tak, Umngot River a khualzinte hiptu manchawia Lawngleng hman dan te zirchian nghal a ni a. He lui fim, li dam tak hi Lengpui kai Tlawng Li, Chhimtuipui, Serlui Tuikhuah  leh Mizorama Lui  thenkhata Li dam deuh nen a inang deuh reng a. Mahse, he luiah hian Lawngleng 200 rual vel a awm a. Heng lawngleng te hi man chawiin darkar khatah Rs 1200 atanga Rs 3500 thlenga hman theih a ni a. Hei hian khualzin a hip nasa hle a, sawrkar speedboat emaw lawng dang a awm lova; heng Lawngleng te hi Tualchhungmite ta vek a ni thung.

Vawiin khan Asia rama Museum lianber, Don Bosco Museum an tlawh a. Hetah hian Mizoram hmuhkhat tak tak, Mizo thil hluite thlengin a awm a. He Museum bulah hian Selestian Congregration enkawl tho, Asia rama Library Chhuanawm pawl, Lehkhabu hrang hrang  1.25 Lakhs leh Digital Book 70,000 awmna Otto Hopfenmueller Library an tlawh leh bawk a. He hunah hian Sacred Heart Theological College hotute Rector, Father Giles Thyniang leh Registrar Father Dennis Lalfela ten Journalist te hi an kaihruaia, thingpui tuitak an hlui bawk a ni.

Mizoram Journalist Press tour a Meghalaya mek mek te hian vawiin lamah hmun thenkhat a tlawh leh dawn a. Shillong a Mizo puipate nen inkawmna te an nei chhunzawm leh dawn a ni.

Attachment

  • Loading attachment...