Mizoram Sawrkar hnuaia Information & Public Relations Department buatsaih Press Tour-a kal Mizoram Journalists’ Association member mi sawm te chuan nimin khan an Press Tour tanna atan Agra tlawhin khawvel huapa hmingthang leh thil mawi te zinga chhiar Taj Mahal chu chipchiar takin an fang kual. Agra an kalna ah hian Yamuna Expressway paltlangin Noida a hmasawnna hrang hrang te an hmu a, Formula One intlansiakna hmun te pawh an hmu bawk. Nimin tlai vek khan Lok Sabha MP Pu C.L. Ruala chuan an pualin a chenna in, MP Flats, Baba Kharak Singh Marg, New Delhi-ah zanriah a buatsaih sak a ni.

Pu C.L. Ruala hmalakna in vawiin khan MJA member te chuan Parliament an tlawh a, Lok Sabha, Rajya Sabha leh Central Hall of Parliament te fang kualin, Sawrkar Laipui thut hmun pawimawh tak North Block leh South Block te pawh an hmu bawk. MJA member te chuan Pu C. L. Ruala hian Press Tour a kal ten Parliament an tlawh theihna atan a hun chep tak karah ruahmanna a lo siam sak theih vangin hian a hnenah lawmthu an sawi.

MJA member te chuan vawiin chawhma khan Chanakyapuri, New Delhi-a, Mizoram House sak thar tlawhin Resident Commissioner Pu Ranbir Singh IAS leh Addl. Resident Commissioner Pi Sangchin Chinzah te chu an hmu a, inkhawmhona hun tha tak an nei bawk.

Press Tour a kal te hi – Pu Lalremsiama, Secretary, MJA Gen. Hqrs. Aizawl; Lalnuntawma Fanai, Vanlalbiaka (Aizawl District ve ve); Pu H. Lalthansanga, President MJA Lunglei District; Pu T Lalrosiama (Saiha District); Pu Lalhmingliana (Champhai District); Pu Lalchunglura(Mamit District); Pu F C Vanlalzawna(Lawngtlai District); Pu C Lallawmzuala (Kolasib District) leh Pu R Lalmuansanga (Serchhip District) te an ni a, Pu Pratap Chhetri, IPRO in a ho a a ni.

Natukah Press Council of India leh Delhi hmun pawimawh dangte an tlawh leh ang.