Pu H. Liansailova, Finance Minister chuan vawiin khan Hrangbana College Golden Hall-ah Mizoram Skill Development Society (MSDS) buatsaih nihnih awh tur Mizoram Skills Expo 2013 a hawng. MSDS chuan Mizo thalai lehkhathiam, hna nghet leh thawh tur mumal neilote tan India ramchhung leh pawnah te hna an thawh theihna tur kawng kawhhmuh leh training pe turin Mizoram Skills Expo 2013 chu September 18 & 19, 2013 chhung hian a buatsaih a. Naktuk September 19 hian Govt Mizo High School Indoor Stadium ah neih chhunzawm a ni ang.
Pu Liansailova chuan hetiang Skills Expo Mizoramin kan nei thei chu MSDS Chairman Pu Haukhum Hauzel, IAS (Rtd) leh a thawhpui te thawhrah a ni tiin thalai kal khawmte chuan he Expo hi hmang tangkai turin a chah a. Thalaite chawikan leh hnathawh tur zawnna atan he Skills Expo hi a pawimawh thusawiin tun dinhmun ah chuan lehkha zir pangai bakah eizawnna kawnga tanpui thei tu tur a ni, a ti bawk.
Pu Haukhum Hauzel, IAS (Rtd) Chairman MSDS leh Member Secretary, State Planning Board chuan Mizo thalai hna hmulo Employment Exchange a inziahlut mi sing 5 chuang an awm mek a, Mizoram ah hna mamawh si, hmulo chu buaipui tham anih thu a sawi a. Pu Haukhum chuan sawrkar hna bakah hmun danga awm Private Company lian, Industries leh hnam anga eizawnna a kan neih (Traditional Occupation) lamah inbeng liam leh tuina tak tak a awm vek theih bawk si loh avangin State pawn leh Ram pawn a hna thawh chu hna hmuhna kawng awm tha ber nia ngaih a ni, a ti a.
Mizoram Skills Expo ah hian Manipal City & Guilds, Apparel Training & Design Centre, Association of Colleges (UK), AVTEG, Bournville College (UK) British Council(UK), Centum Work Skills India, Don Bosco Tech leh XLT Jaypee te an tel a ni.
