India in ‘Look East Policy’ a duan denchhena, Myanmar nen insumdawnna kalpui tur chungchang leh Prime Minister in Myanmar a tlawh dawn avanga ramri a insumdawn tawnna hmun rawn thlithlai paha zan khat riaka lo zin, Pu T.K.A.Nair, Advisor to Prime Minister chuan nimin tlai khan Chief Minister Pu Lal Thanhawla chu a chenna bungalow ah hmuin inkawm hun tha tak an nei a. Hemi hnu hian Chief Minister Office’s Conference Room-ah Mizoram sorkar mipawimawhte leh BRTF leh Assam Rifles hotute a kawm nghal a ni.

Chief Minister chuan Myanmar nena ramri, Mizoram chhim leh chhak lamah Km 404 a thui zet kan neih thu a sawi a, hetah hian awlsam taka ramri kan theihna km 16 zeta thui a awm a ni a ti a. Sorkar laipuiin Bay of Bengal tuipui atanga Mizoram chhim lam rawn kalpawhna tur, Myanmar lawngchawlhna Sittwe Port kaltlanga Multi Modal Trade Route a motor kawngpui siam hna, Km 100 a thui - km 60 vel Mizoram chhunga awm tur - hna thawh mek a nih thute Pu Nair hi a hrilh a. Multi Modal Road hian Sittwe a pawh hunah chuan Zokhawthar leh Zorinpui Land Customs Stationste chu trade route lian tham tak a nih phak ngei a beiseiawm a ni a ti.

Chief Minister hian April 2012 a India Foreign Secretary Pu Ranjan Mathai leh Myanmar Ambassador Pu U Zin Yaw ten Mizoram an rawn tlawh thu leh Champhaiah Myanmar sipai officers te hnena Champhai a DIET lecturer ten saptawng zirtirna an pek thute Advisor hi a hrilh bawk a. Mizo thalai saptawng thiam thahnem tak kan neih thu sawilang bawkin, State Skill Development Mission atan hian Prime Minister Office in a tul ang sum min ngaihtuah sak se a ti bawk a ni.

Chief Minister chuan thil ngaimawhawm hrang hrang kan neihte a sawilang bawk a; chungte zingah chuan ramri kan awlsamna hian drugs leh silai tawlhruk ati zualkai a, hei vang hian ramri vengtu sipai Assam Rifles leh BSF te thuam chak a, Telecom service pawh tihchak nise a ti a; sum harsatna avangin Mizoram chhaklam leh chhimlam kawngpuite hi Border Roads Organisation kutah awm mai se tha a tih thute, Myanmar sipai hlauh vanga Mizorama raltlan, Chin mi nuai 1 vel awm hian harsatna tam tak kan tawh phah thute, hmarchhak hi hmasawnna ruhrel- infrastructure development ngaihpawimawh hmasakah sorkar laipuiin min neih sak se, abikin Mizoramah inkalpawhna ber hi motor kawngpui anih avangin tih hmasawn a tul tak zet a ni a ti.

Pu TKA Nair hian nimin khan helicopterin Zokhawthar Land Customs Station a han tlawh hmasa a, amah hi Border Roads Organisation hotulu ber, Director General, Lt Gen. S. Ravi Shankar, PVSM,VSM in a rawn tawiawm a ni.