Pu S. Hiato Minister, PHE etc chuan nimin 17th May 2012 khan Dampui khua tuilakna a hawng.
Hemi puala inkhawm Dampui, Community Hall-a buatsaih Er. Vanlallianzuala, Chief Engineer (M&I) kaihruaiah khuallian Pu S. Hiato chuan Mizoram sawrkar leh bialtu MLA Pu John Rotluangliana thahnemngaihna azarah Dampui khaw tuipekna, Dampui Water Supply Scheme hawn theih a ni chu thil lawmawm tak a ni a ti a, hei hian tui nghak a hun tam tak kan pek thin a tih bo mai bakah tui thianghlim hnianghnar kan neih tak avang hian hriselna kawngah pawh Dampui khua-in hma a sawn a beisei thu a sawi bawk. Khuallian chuan nungcha humhalhna atana pawimawh chu ram ngaw humhalh anih thu tarlangin hei hian tuihna tha tak min pe-in he mi kawngah hian tlawmngai pawl hrang hrangte nen kan thawk ho a ni tiin ramngaw humhalh kawnga nasa leh zuala tan la turin Dampui khaw mipui te a sawm bawk.
Khuallian chuan tui thianghlim hnianghnar khaw tina pek hi sawrkar thil tum a nih thu tarlangin Mizorama khaw awm zawng zawng 777-ah khaw 711 tuipek tawh a nih thu a sawi a, khaw 57 ah pek tuma hmalak mek a ni a ti bawk.
Khualzahawm Pu John Rotluangliana Bialtu MLA, Deputy Speaker ni bawk pawhin he hun hi hmanpuiin Bialtu a nihna angin sawrkar leh Department chungah lawmthu a sawi a. Sawrkarin khua leh tuite tana thil tha a tih hi Politics anih thu sawiin thil tha tihna kawngah nasa takin mawhphurtuten hma kan lak a pawimawh a ni a ti bawk. Vawiin niah hian duh tawk mai lova a enkawl zuina kawngah Dampui mipuiten theihtawp an chhuah a tul thu tarlangin sawrkarin min tih sak se tih nghak mai lova sawrkar hi engnge ka tih sak theih ang tih rilru pu theuh turin kalkhawmte a chah bawk.
Pu Rodney L. Ralte, IAS District Bawrhsap leh Pawan Kumar E-in-C PHED pawhin thu an sawi bawk a ni.
Er. H. Lalsiamliana EE, Mamit pawhin Technical Report peiin Dampui tuilak hi NRDWP sum, Rs 1,21,72,000/- senga siam niin Dampui khua hian nitin tui tin 1946 mamawh a ni a, Pump Capacity hi darkar khatah tin 1066 a pump thei a ni, Dampui khua atanga 1km a hla Dampui Lui atanga lak a ni bawk. Public Point hmun 8-ah siam niin Connection lakna tur Point 5 siam a ni. Dampui khuah hian In 155 awmin mihring 730 vel an khawsa mek a ni. Minister hi Pu John Rotluangliana Bialtu MLA, Officials leh Party hruaitu thahnem takin an tawiawm a ni
