Nimin chawhnu dar 2 khan Principal Adviser to Prime Minister Pu TK Nayer chuan Zokhawthar a tlawh a, Border Road Organization Director General Lt. Gen. Ravi Shanker leh Sanjay Nohla, Director PMO ten an tawiawm a ni.

Principal Adviser to PM Pu Nayer chuan Zokhawthar a tlawh chhan chu tun May thla tawp lam khian Prime Minister Dr Manmohan Singh in Myanmar ram a tlawh dawn a, Myanmar ram hruaitute hnena a thu thlen tur zingah Border Trade tih changtlunna tur te, lian zawka insumdawn tawnna kalpui anih theih dan tur te a tel a, chumi atana pawimawh tur te a rawn zir chiang tih a sawi.

Pu TK Nayer leh a team te hi Zokhawthar field-a helicopter a an tum hnuah motor in Tiau kama Land Custom Station building an pan thla nghal a, hetah hian Official te hnenah Border Trade atana infrastructure la awm te zawtin Customs Department hnenah Border Trade kalpui anih dan te a zawt a, hemi hnu hian Champhai DC Pu Vijay Kumar Bidhuri kaihhruaiin inkawmhona neih zui a ni.

He inkawmhonaah hian Trade License neitu pawl Champhai Syndicate Association leh Champhai Economic Welfare Society te chuan Border Trade hlawhtlinna atana pawimawh chi 3 an lo thlen a, chungte chu: - 1, Myanmar lamah kawngpui a la tlang loh avangin sumdawnna bungrua te chu motor te (small vehicle) hmanga rawn phurh a nih avangin phurh man a to a, kawngpui Han lain tlang nise 2) Dan ang taka Myanmar atanga eitur lam lakluhte hi Guwahati-a Food Testing Laboratory ah endik zel a ngaih avangin hun a duh rei a, endikna result a lo thlen chuan bungrua a lo chhe hman thin a, hei vang hian Zokhawtharah Food Testing Laboratory dah nise tih leh 3)Myanmar in a ram chhunga lakluh a duh Chini leh Leichi (Fertilizer), trade item 40 zinga tel ni si te hi sorkar in a control avangin tih theih a ni lova, heng thil chi hnih te hi export theih tura hmalak sak turin Principal Adviser chu an lo ngen bawk a ni.

Zokhawthar VC te pawhin Seling to Zokhawthar Double Lane laih tura tih chu a taka thawk tawh tur te, inbiakpawhna lam BSNL, Airtel, Aircel leh Reliance ten Tower rawn bun ve se, tunah hian khawi atang mahin biakpawh theih an ni lo tih te, State Bank of India chu mipui dawr theih tura function tur te, Post Office dah tur leh Doctor dah turte in an ngen bawk. Heng mamawh an lo thlen te hi Pu Nayer chuan a chhinchhiah a, thenkhat chu Prime Minister office-a complaint emaw thehlut turte in a lo rawn a ni.

Zokhawthar Land Customs Station chhinchhiah danin Mizoram atangin Myanmar ah kum 2010 khan Hmunphiah kg 2069, nutrela 2.069 matric Ton, Rs. 60, 000 man thawn chhoh a ni a, Myanmar atangin kuhva 550 quintal, a hlutna Rs.22, 27,740 lakluh a ni tawh a, kuhva lakluh hnuhnung ber chu June 2, 2011 daih kha anih thu an sawi a, tunah hian Mizoram pumah trade license IEC nei Customs Dept. a inziak lut chu mi 53 an nih thu an sawi bawk.

Principal Adviser to PM hmuahnaah hian Champhai D.C bakah Pu Lalthanmawia, SP Champhai, Customs Official te, Assam Rifles, BRTF, Champhai a sawrkar official te bakah Trade & Commerce atangin Dy. Director te an kal a ni.

Principal Adviser leh a team te hi nizan khan Aizawl-ah riakin Sorkar hotute nen meeting pawimawh an nei leh a ni.