Nimin chawhnu lam khan Parliamenatary Secretary Pu KS Thanga chuan Sialsukah 33kv Sub station a hawng.

Power Sub Station hawnna puala inkhawm tawite buatsaihah hian Pu KS Thanga chuan bial hnufum leh ngaihthah nia hriat thin, mi thenkhat phei chuan Arakan bial tia fiamthu thawh nana an hman thin chu tunah chuan bial inthurual leh hmasawn chak ber pawl a ni tawh, a ti a. Zirna, hriselna bakah khawtlang nunphung hrim hrim pawhin chak takin hma a sawn a, Mizoram chhunga kawngpui lian ber pakhat paltlang niin chak takin he bial hian ke a pen a ni, a ti. He tlangdung khua Aibawk leh Sialsukah Power Substation hawng thei tura hma laksak tu Chief Minister leh a Parliamentary Secretary te chungah lawmthu sawiin theihtawp chhuaha chhunzan zawma hna kalpuitu P&E Staff te chungah lawmthu a sawi bawk a. Mizoram chu kawlphetha ah hnianghnar tak tak thei rihlo mahse tunah hian Power siamchhuak tura theihtawp chhuah a nih dan tarlangin Tuirial Hydel Project pawh chak taka kalpui a nih thu a sawi lang bawk.

Sialsuk leh a chhehvel khua ten kawlphetha hnianghnar leh changtlung zawk an neih theih nan 33kV Grid Sub Station hi North Eastern Counil Scheme hnuaiah siam a ni a. 1 x 2.5 MVA, 33/11 KV Transformer bun niin 11kV Feeder pahnih a awm bawk. Feeder pakhat zawk hi Sialsuk leh Sailam khua te pekna tur a ruahman a ni a, Feeder dang leh hi Samlukhai leh Thingsei khua te pekna tura ruahman a ni thung. 11kV line thar engemawzat, line siamrem nan siambelh a ni bawk. Sub Station leh Line hna zawng zawng hi March 2012 ah a Estimated Cost cheng nuai 497 chhunga zawh fel vek a ni a, mipui te hman theih turin April ni 20 khan hlawhtling taka enchhin a ni.

Parliamentary Secretary Pu KS Thanga hian Aibawkah nimin vek khan 33kV Sub Station, cheng nuai 253.67 senga siam chu a lo hawng tawh bawk.