Khawvel huapa lung lam daktawr thiam hmingthang Dr KM Cherian leh a thawhpui Dr Christopher Roy, Dr Prem Shekhar, Dr Pramod Jaiswal leh Dr. Prasad te chuan vawiin khan Aizawl Civil Hospital-ah zing dar 8:30 atanga tlai dar 5 thleng a thlawnin damlo thahnem tak an en.

Mizoram Larsap Pu Vakkom Purushotham-a’n a thahnemngaihna avanga heng daktawr thiam rual a chah chhuah te hian a thlawna inentirna hi naktuk zing dar 8:30 atangin tlai dar 5 thleng Synod Hospital, Durtlangah an chhunzawm leh dawn a ni. A thlawna inentirna hi mipuiin an hlut hle a, vawiin chhun dar 1:30 thleng khan lung lama harsatna nei 300 lai an inentir hman a ni. Aizawl Civil Hospital a daktawr rual te pawhin hun remchang la in Dr Cherian-a ho hian seminar vawiin chhun vek khan an nei hman.

Daktawr hna thiam avanga Honorary Surgeon to President of India dinhmun hlawhpha tawh, Padma Shri dawngtu leh Dr KM Cherian Heart Foundation dintu hi naupang lungzai lama sulsutu a ni a, India ramah lung leh chuap hlawhtling taka thlak hmasaber a ni bawk.