UD & PA Minister Pu Zodintluanga chuan vawiin khan Kolasib tlawhin Kolasib Town Road siam mek chungchang, hemi puala din Committee memberte nen an thlir hova, Parliamentary Secretary Pu S. Laldingliana pawh he meeting-ah hian a tel a ni.

Kolasib DC Conference Hall-a hemi puala meeting neihah hian Town Road Coordination Committee member te leh Contractor te an tel a. Pu Zodintluanga chuan thu sawiin, Kolasib Town Road siamna tura Central sum an nei chu an vanneihzia a sawi a. Amaherawh chu a tir atanga thil kal fuh loh avanga Contractor pakhat zawk chu ban hial a nih thu leh tun hnu zela kawng siam tur 6.2 kms nuai bo a nih tak avang leh kawng siam hna that tawkloh vanga ama hnen ngeia khaw mipuiten zawhna an pek nasatzia a sawi a. Hemi chungchang hi hnathawktu NBCC te chu sawifiaha a thawm theih dan awm apiangte thawh tha a tihzia a sawi a ni.

DC Pi Niharika Rai chuan Town Road Coordination Committee chuan kawng tha leh rotling neih theihna tura vawi duailo Committee an neih thin thu leh kawng siam hna a bik taka endiktu tur Monitoring Committee din chuan endikna hna an thawh thin thu a sawi a. Meeting ah hian kawng siam chu duhthusam diak diak nilo mahse hma a sawn hle a an hriat thu member ten an sawi bawk a ni. Kawng siam tur atanga paih tawh 6.2 kms chu a theih dan kawng dap a siam leh nise tiin Minister ho hian rel a ni bawk a ni.

Kolasib Town Road hi Package I leh II ah then a niin package I hi March thla khan thawh zawh tawh a ni a. Package II hi June thla tawpa zawh tura tih a ni.

Vawiin chawhma lam khan Pu Zodintluanga chuan Kolasib Saidan Sports Academy chu a hmunah a en a. He hmunah hian Hall tha tak awmin tih changtlun chhoh mek a ni a, Multi Gym te, awmin hetah hian silai kahna hmun te pawh la daha sports discipline hrang hranga thalaite inhnangfakna hmun tura chei mek a ni.

Minister hian I&PR District Office sak mek leh a bula Press Club hmun te a tlawh a. Pu S. Laldingliana bakah Pu K. Lalthawmmawia, Director, UD & PA leh sawrkar officer dangten an tawiawm a ni.