No.523/2021-2022

Aizawl the 14th May, 2021 : Ram chhunga loneituten an hnathawhna tur leh thil dang pawimawh atana an hman tur kum khata Cheng Sangruk, loneitu pakhatin an dawn ziah theihna tura Sawrkar laipuiin a duan chhuah, Pradhan Mantri Kisan Samman Nidhi (PM-KISAN), Prime Minister Shri Narendra Modi-an February Ni 24, 2019-a a hawn tawh chungchang sawi hona vawiin dar 11:00-a Prime Minister hova Video Conference hmanga neihah Chief Minister Pu Zoramthanga ai awhin Agriculture Minister Pu C.Lalrinsanga a tel.

He Sawrkar laipui scheme hnuaiah hian loneitu mi Vaibelchhe Sawm leh Nuaih Sawmriat Pahnih zetin a zar zo tawhin pawisa Vaibelchhe Nuaihkhat Singkhat Sangruk Zahnih Sawmkua Pahnih chuang India rama loneitute Bank Account-ah hian chhunluh tawh a ni a, vawiin khan Sawrkar laipui chuan Loneitu Vaibelchhe Kua leh Nuai Nga ( over 9.5 crore farmers) chuangte tan sum Vaibelchhe Singkhat Sangkua chuang kumin April thla atanga July thla chhunga an Bank account-a thun tur a pe chhuak a ni.

He Video Conference-a Mizoram Sawrkar aiawha tel Agriculture Minister, Pu C.Lalrinsanga chuan PM-KISAN hnuaiah hian Mizoram kuthnathawktu mi 1,90,002 ziahluh tawh niin, chung zinga 1,49,933 te chuan he hamthatna zar hi zo tawhin pawisa Cheng Vaibelchhe Zasawmhnih Paruk chuang lai mai an Bank Account-ah chhunluh tawh a ni a ti. He Scheme hnuaia Loneitute tanpuina hi thla 4 dan zelah kum khatah Installment 3-a pek chhuah thin a ni a, Installment khatah Rs. 2,000/- zela pek a ni. He Scheme hnuaia inziak lut hmasa te chuan Installment 7-na thlengin tanpuina sum hi an dawng tawh a ni. PM-KISAN hnuaiah hian chhungkuaa member pakhat chauh hminga hamthatna hi dawn tur a ni a, chhungkaw thenkhat atanga hming pakhat aia tam inziak lut te chu endiknaah paih theih an ni a ti.

Agriculture Minister chuan PM-KISAN hnuaiah hian Mizorama loneitu eng emaw zat inziaklut tawh si tanpuina la dawng lo an awm tih Mizoram sawrkar hotute chuan an hria a, heng mite hian an dawn theih ngeina turin kawng a dappui mek a, heng loneitu harsatna tawkte hian harsatna an tawh chhan ber chu Aadhaar Card dik lo vang te, Bank Account dik loh vang te, Bank Account IFSC Code dik tawk lo vang tein a ni ber a, heng avanga loneitu harsatna tawk te chuan an bialtu BDO hnenah emaw, Common Service Centre hnai berah emaw hriattir tur a ni a ti a.

He Video Conference hmanga sawihonaah hian Pu J.Hmingthanmawia, Special Secretary, Agriculture leh Pu Rohmingthanga Colney, Agriculture Director te pawh an tel a ni.