708/2022-2023
Champhai, the 31st May, 2022: Sawrkar laipuiin mipuite chawikanna leh hmasawnna tur tinzawna scheme hrang hrang a siam hnuaia hamthatna dawngtu, India ram hmun hrang hrang amite Prime Minister of India-in video conference kaltlanga a kawmna 'Miretheite Chhawmdawlna pual Inkhawmpui-Garib Kalyan Sammelan', vawiin chawhma dar 10:55 atanga neih chu Champhai DC Conference Hall atangin Law & Judicial Minister Pu T.J. Lalnuntluanga hovin zawm a ni.

He hun puala inkhawm tawi buatsaih khuallian nia telpuitu Law & Judicial Minister, Pu T.J. Lalnuntluanga chuan hmasawnna lam hawi programme ngaihhlutawm tak Sawrkar laipui hnuaia Scheme pawimawh tak takte inhrilhhriatna leh inrawnkhawmna hun buatsaih a ni thei chu lawmawm tiin, phurawm a tih thu a sawi a. Mahni ro inrel hranin kum 75 dawn India ram a kal hnuah hmasawnna tam tak hmuh tur a awm tawh thu sawiin, a lawmna pual Azadi ka Amrit Mahotsav kaltlanga hmasawnnate puanzar leh inzirtirna kalpui chuan kum 100 thlen huna hmasawnna hmathlir thui tak min neih tir ngei ka beisei tlat a ni, a ti.

Sawrkar laipui leh State sawrkar tangdun kaltlanga Scheme pawimawh tak tak hmanga Champhai District-a hmalakna hrang hrangte chhuanawm a tih thu a tarlang a. Champhai Master Plan final publication tun atanga reiloteah neih tum a nih thu sawiin, Master Plan hmangin Town Planning leh hmasawnna ruhrel pawimawhte duana siam tum a ni a, JAICA te pawh a tul ang zela biakpawha rawn reng an ni, a ti. Champhai tuitlan Tuipui humhalh kawnga hmalakna awmte fakawm tiin, hmasawnna kawng zawhnaa khawtlang mipui, VC leh NGO te tawiawmna chuan hmasawnna thar duhawm a thlen ngei a rin thu a sawi a. Bank kaltlanga hamthatna awmte mipuiten an hmelhriata an chhawr tangkai a duhsak thu sawiin, thuneitute leh thawktute chu hemi kawnga inzirtirna tam zawk kalpui turin a chah a ni.

Law & Judicial Minister chuan hmasawnna zawh kawngah hun khaihlak leh insiamrem chhoh hunlai tawn mek a nih thu sawiin, mipuite chu hun khaihlak lai hrethiama dawhthei taka kan ramin hma a sawnna turte ngaichanga beiseina thar nei turin a chah a, sawrkar pawhin ngaihtuahna dik mipuite tana hmasawnna thlen tur thil a ngaihtuah fo a tul thu a sawi bawk a. Central Scheme fund-te a hun taka mipuite hnen a thlen theih nan sawrkarin theihtawp a chhuah thin thu sawiin, mipuite chu ngaihtuahna dik leh rinawmna neia hamthatna dawn kaltlanga hlawhtlinna chan ngei tum turin a fuih a. Inpawhtlang taka awmin khuain hma a sawnna tur ngaihven chung zela lungrual taka thawhho tlan zel a tul thu pawh tarlangin, chhungkaw nuam leh khawtlang nuam siam turin inlungrualna, inpawhtlanna leh thawhhona tha neih zel a tul a ni, a ti a. Mipui leh khawtlang tana tha tur leh mamawhte inpawhtlang taka thawhho zel a nih theih nan harsatna neihte a hnena inthlahrung hauh lova thlen zel turin a sawm nghal bawk a ni.

He hun puala hun hman thawhkhatna zing dar 9:45 a buatsaih hi Pu James Lalrinchhana, DC Champhai chuan kaihruaiin kalkhawmte lawmna thu a sawi a. Program neih a nih chhan leh hun hman dan tur tlangpuite tarlangin Sawrkar laipui scheme pawimawh tak tak hnuaia hamthatna dawngtute nena inkawmhona leh scheme inzirtirna huaihawt chu hlawkthlak a tih thu a sawi a. Mipuite chu scheme tihlawhtling tura pawimawh berte an nih thu sawiin, hamthatna an dawn chhan ang ngeia thahnemngai taka thawk turin a fuih a ni.

He hunah Sawrkar laipui scheme-te zirchianna leh inhrilhhriatna neih a ni pah bawk a. Zirtirna hrang hrang neih a ni a; Pi R.Lalnunkimi, DUDO Champhai hnen atangin Swachh Bharat Mission (Urban), Pu Jyoti Munna Soren, Lead District Manager (LDM) Champhai hnen atangin PM MUDRA Yojana, Er. Z.D Dengthuama, EE, Champhai WATSAN Division hnen atangin Jal Jeevan Mission & AMRUT, Pu C.C Sakhawliana, DCSO Champhai hnen atangin Pradhanmantri Ujjwala Yojana leh Pradhanmantri Garib Kalyan Yojana te ngaihthlak a ni a. Dr. Lallawmkima, DIPRO hnen atangin Sawrkar Scheme pawimawh te puanzar a nih theih nana hmalak tulte ngaihthlak niin, Pu Lalnunfela Chawngthu SDO Sadar, SEDP Nodal Officer-in State sawrkar flagship programme SEDP chungchanga hmalaknate a sawifiah bakah Pu Vanlalchhuanliana, BDO Champhai & Settlement Officer Champhai hnen atangin PMAY leh Revenue chungchanga hriat tulte ngaihthlak a ni bawk.

Khuallian, Line Department Official, sawm bik kalkhawmte leh hamthatna dawngtuten inkawmna hun an hmang a, Pu Lalnunfela Chawngthu, SDO(S) in lawmthu sawia hun hman thawhkhatna a khar fel hnuah Prime Minister hova Shimla, Himachal Pradesh-a National Level-a hun hmanna chu video conference kaltlanga zawm a ni.

He hun hi ram zalen kan nih kum 75 pumhlumna tur champhaphak lawmna Azadi Ka Amrit Mahotsav puala buatsaih a ni a. He kum 75 chhung hian India sawrkar chuan a mite zinga rethei leh chan chhe zawkte'n lei rem an rah a, an nunphungin hma a sawn a, rual pawl ve phaka awmtir a duh avangin kawng hrang hrangin anmahni dawmkanna tur a ngaihtuah a. Mi retheite thleng phak hmalakna (scheme) hrang hrang duang chhuakin ram pumah chutiang zarzotu chu vaibelchhe tel an awm tawh a ni. Zalenna kan neih lawmna peng pakhat atan scheme hrang hrang zarzotute chu hmaichhana kawm a, sawrkar hmalaknain an nunphung a thlak danglam dan ngaihthlaksak bakah hmalakna dang dangte nena hrual mum a, chhawrnahawm zawka duan zel dan a awm em tih sawi hona, 'Mi Retheite Chhawmdawlna Inkhawmpui - Garib Kalyan Sammelan' hi buatsaih a lo ni ta a ni.

He inkhawmpui hi kan ramin zalenna a neih kum 100 tlin hun thlir chunga hma kan sawn zel theih dan tur ngaihtuah hona leh mipui mar dehna hun bik atana ruahman a ni a. He inkhawmpui hi vawiin hian India ram puma district zawng zawngah a ruala hman a ni a, ram pum huapa inkhawmpui lian berte zinga mi a ni pha a ni. Hun hi thawh hniha then niin thawh khatnaah chuan state/district hrang hrangah kalphung inang neia hun hman hmasak a ni a; a thawh hnihna chu Prime Minister-in Shimla, Himachal Pradesh-a hun a hmanna video-conference hmanga a huhoa chhim a ni. He hunah hian Prime Minister chuan hmalakna (scheme) hrang hrang sawmparuk (16) vel zet hnuaia tanpuina dawngtute chu hmaichhanah kawmin, an tana hun bik siamah hian an thu thlente a ngaihthlaksak a ni.

He hunah hian Sawrkar laipui scheme pawimawh tak tak; PM Awaas Yojana (Grameen & Urban), PM Kisan Samman Nidhi, PM Ujjwala Yojana, POSHAN Abhiyan, PM Matru Vandana Yojana, Swachh Bharat Mission, Jal Jeevan Mission & AMRUT, PM SVANidhi Scheme, One Nation One Ration Card & PM Garib Kalyan Anna Yojana, Ayushman Bharat PM Jan Arogya Yojana & Ayushman Bharat Healh Health & Family Welfare and Wellness Centre leh PM Mudra Yojana hamthatna dawngtute bakah, Line Department Official, VC leh NGO hotute an tel a ni.