707/2022-2023
Aizawl 31st May 2022: India ram zalenna champhaphak vawi 75-na Azadi ka Amrit Mahotsav lawmna kal zelah vawiin khan India Prime Minister Pu Narendra Modi chuan Sawrkar Laipuiin mipui dinhmun chawi kanna tur scheme hrang hrang a neihte mipui hmaah puangzarin, Himachal Pradesh khawpui Shimla-ah hun a hmang a. He programme hi live a pek chhuah niin ram chhung hmun hrang hrang 1500 atangin an chhim a. hemi pual hian Mizoramah pawh Vanapa Hall-ah Mizoram Legislative Assembly Speaker Pu Lalrinliana Sailo hovin hun hman a ni a. Chhun dar 11-ah online hmanga Prime Minister thusawi hi puanchhuah tan niin, Mizoram Chief Minister Pu Zoramthanga pawhin a pisaah atangin a lo chhim a ni.

Pu Lalrinliana Sailo chuan mitin hnena hmasawnna a thlen theih nan India sawkar chuan hma a la a, chutah chuan Mizoram pawh hi tel vein heng scheme hrang hrang hlawhtlinna tur hian sawrkar leh mipui kan tan tlan a ngai tak meuh a ni, a ti a. Programe leh Scheme hrang hrang sawrkar laipuiin tang takin a rawn kalpui a, mahni state ah theuh state sawrkar ten a takin kan kalpui a, heng scheme hlawhtlinna tura nasa taka thawktu sawrkar hnathawk ten an titha hle, Speaker chuan a ti. Sawrkar laipui chuan mipuite hne hnai thei ang ber turin “sabke saath sabka vikas” tih thupui hmangin mipui mimir kan zavaia hmasawnna turin tan a la nasa hle a, hetiang ang zul zui hian Mizoramah pawh hmasawnna tak tak thleng turin mipui mimir thleng phak hmasawnna hna chak leh zuala thawh a pawimawh hle a ni, khuallian chuan a ti.

Vawiin programme ah hian Aizawl DC Office, Rural Development Department, Agriculture Department, Indian Oil Corporation Ltd., Women and Child Development, UD&PA, PHE, Health leh Lead Bank aiawh ten mipui hmasawnna tur sawrkar laipui scheme leh programme an kalpui te puanzarna hun an hmang a. Beneficiary kalkhawm te hmaah heng scheme hrang hrang an kalpuite sawfiahin, mipuiin an chhawr tangkai ve theih dan tur kawng an kawhhmuh a ni.

Prime Minister Pu Narendra Modi hian Shimla-a programme buatsaihah hian thu a sawi bakah mipui mimir te nen inkawmna hun, zawhna leh chhanna hun a hmanpui nghal bawk a ni.

Vawiin Aizawla programme buatsaih kaihruaitu Planning Secretary Pu Lalmalsawma chuan Azadi ka Amrit Mahotsav chungchang a sawifiah a. He programme hi March 12, 2021 atanga bul tanin August 15, 2023 thleng kar 75 chhung ram pum huapin a chher chhuana lawmna leh hmalakna peng tam tak buatsaih a nih dan leh Mizoram pawhin he hun kan hman dan tlangpui te a tarlang a. Mizoramah chuan Roundtable on Eco-Tourism, Roundtable on Role of Bamboo, presentation of best practices an neih tawh thu leh District pual leh department hrang hrang ten event hrang hrang an buatsaih tawh tih a sawi a. Hmabak chi thum - Har Ghar Jandha- August 9 - August 16, 2022 chhunga in tina India flag zar te, Amrit Sarovar - thingtlanga tuihna siamthat leh tihpun bakah Law and Judicial hmalakna tur de-criminalisation of laws for ease of living and ease of doing business tih te chu hmachhawp a la nih thu a sawi a ni.

Vawiin programme Aizawl DC Office buatsaihah hian Planning Board Vice Chairman Pu H Rammawi, Deputy Speaker Er Lalrinawma, MLA engemawzat bakah Aizawl Mayor Pu Lalrinenga Sailo, Deputy Mayor Pu R Thanglura te pawh an tel a. Presentation hrang hrang ngaihthlak a nih hnuah hian Pu Lalnundika, Additional DC Aizawl chuan lawmthu sawiin hun hnung a khar a ni.