Nimin tlai lam khan Mizoram sawrkar Principal Secretary for Home, Pi Renu Sharma, IAS chuan Lawngtlai kiang Thingkah khuaa 3rd IR Battalion hmunpui tur sak mek a tlawh a, hnathawh chin tawh leh hmabak la awm hrang hrangte a hmunah a tlawh kual.

He sipai hmunpui, Northeast Consultancy Services Limited (NECS) in a sak mek hi Ministry of DoNER atanga Rs 2842.28 lakhs senna tur ruahmanna niin tunah hian Central sawrkarin Rs 1023.22 Lakhs a rawn pechhuak tawh a, thla 36 chhunga sak zawh tur niin tunah hian a satu tur Company te hian hna hrang hrangah bul tan tawhin Earthwork tam zawk leh Building thenkhat Structure te pawh engemaw chen an thawk tawh a ni.

Pi Renu Sharma chuan, Mizoram hi fur ruahtui tlak tamna hmun a ni a chu chu hnathawhna hrang hrangah chhuanlamah an hmang fo thin. Amaherawh chu Project tam zawk hi chu thil hre saa duan leh thawh an ni a, chhuanlam atana hman leh si hi a tling tawklo a ni, a ti a. Hnathawktute chu a hun taka zawh hman tum turin a fuih a ni. Hnathawktute hian harsatna an tawh hrang hrangte Secretary hnenah hian an lo thlen ve bawk a ni.

Principal Secretary Pi Renu Sharma hi Aizawl atangin Pu Lalbiakzama, MPS, Addl. Secretary, Home leh Pu Lalbiakthanga Khiangte, IPS, AIG II ten an rawn tawiawm a, Lawngtlai Bawrhsap Dr A. Muthamma, IAS; Pu Lalsanglura, MPS, SP Lawngtlai, Addl DC Pu R. Lalsangluaia, MCS leh Pu Lallawmawma, SDO Sadaar ten an lo dawng sawng a ni.