Vawiin khan Mizoram Civil Pensioners’ Association (MCPA) General Headquarters chuan Vanapa Hall-ah General Assembly vawi-42na an hmang a. Finance Minister Pu Lalsawta chu khuallian a ni.
Pu Lalsawta chuan kum tam tak sawrkar hna lo thawk tawh, pension-a chhuaktate thawhrim rah chu a tha zawngin Mizoramin a tel mek a ni, a ti. Finance Minister chuan pensioner-te chu an hun tha liam tawhin hnathawh tur nei tawh lovah inngai lo tur leh an tawnhriat atanga finna tam tak an puak chhuah chu Zoram tana hmang tangkai turin a sawm a. An thawhrim rah seng tur tam tak awm mahse a la tawk lova, hmabak hlen chhuah tur an la nei tiin ram tana thawhpuiah kalkhawm te a sawm a ni. Ram hmasawnna turin thil thar, danglam, kan tih thin bansana thlakthleng a ngai thin nia sawiin hei hi mipuiten kan hlau tur a nilo, Pu Lalsawta chuan a ti a. Kan ramin harsatna a tawhte a awm a nih chuan ram dang mite chinfel turah dah lovin keimahni ngeiin kan chinfel a ngai tih hre thar leh turin he hunah hian Pu Lalsawta chuan mipuite a sawm a ni.
MCPA General Assembly hi an pawl Vice President Pu LT Hluana’n a kaihruai a. General Secretary Pu V.Dingliana leh Finance Secretary Pu RC Liana-te hnena atangin report ngaihthlak a ni. General Assembly palai zinga kum 90 chin chunglam mi pali- Pi Darhmingthangi (92), Zarkawt; Pi Rallianchhungi (92), Armed Veng South; Pu R.Vankhuma (90), Vaivakawn leh Pu Lalmama (90), Ramhlun North te hnenah chawimawina hlan a ni a. Pu R.Vankhuma’n a nu Pi Chhingtei hriatreng nan Award a siam ‘Chhingtei Memorial Award’ chu Branch tithate hnenah hlan a ni a. Chhingtei Award dawngtute chu an tihthat dan indawtin - Darlawn Branch, Khawruhlian Branch leh Vairengte Branch te an ni. Vawiin chawhma session-ah hian 2015 leh 2016 General Assembly inkar chhunga an member thi mi 225-te an sun a. Chawhnu lamah rorel leh kum 2016-2018 atana hruaitu thar thlanna hun an hmang bawk.
Assam State hnuaia Mizoram a la awm lai, kum 1955, July ni 16 khan All Assam Government Pensioners’ Association, Aizawl Branch tiin he pawl hi member 99 neiin a lo ding tan a. Chutihlaia an President hmasa ber chu Pu Lalchana, Venghlui a ni. Mizoram UT a hlankai a nih hnuah April ni 4, 1974 khan Mizoram Civil Pensioners’ Association tiin an lo invuah ta a. Tunah hian Sub Headquarters paruk - Kolasib, Mamit, Serchhip, Saiha, Lawngtlai, Champhai leh Khawzawl hnuaiah Branch 1500 neiin member 9000 bawr vel an awm a ni.
