Vawiin khan Kolasib DC Conference Hall-ah Pu H. Lalengmawia, DC Kolasib, IAS hovin District Level Standing Committee on Election chu an thukhawm a. May ni 19 a Kolasib District huam chhunga khaw paruk - N.Chawnpui, H. Hlimen, Phainuam, Saihapui 'V', Saiphai leh Saipum a Village Council inthlanna (by election) nei tur chungchanga inpuahchahna, venhimna kalpui dan tur leh he inthlanna hi felfai leh thianghlim taka neih anih theih nana thil pawimawh te sawihoin ruahmanna siam tawhsa engemawzat an thlir ho a ni.

Pu H. Lalengmawia chuan he inthlanna hi felfai leh thianghlim taka buaina awm lova kalpui chu Sawrkar leh State Election Commission duhdan anih thu te sawiin he inthlannaah hian mawhphurhna neite chu fimkhur taka an mawhphurhna hlenchhuak a, uluk taka inpuahchahna te enpui leh vil a tul thu a sawi a. He inthlanna hi VC election anih vang ringawtin tumah inthlahdah a thiang lova, election thila thil tihsual zeuh awm thin hi thiam loh vang ai mahin inthlahdah vang nia a hriat thu a sawi a. He inthlanna hi tluang tak leh muanawm taka neih anih theih nan amah ngeiin ruahmanna leh inpuahchahna te vil a tum thu a sawi a. Inthlanna ani emaw khawtlang thilah ani emaw tlawmngai pawl leh civil society te hi an pawimawhin an thawhhlawk hle a, chuvangin he inthlanna ah pawh hian an tawiawmna leh an thawhpuina te chu beisei anih thu a sawi bawk.

Kolasib SP Pu C. Lalzahngoa chuan venhimna kalpui dan tur ruahmanna te sawiin DSP pahnih in khaw 3 ve ve an vil tur thu te, Saiphai leh Saipum ah BOP Platoon awmsa bakah khaw dang pali ah inthlan dawn hnaih a, half section theuh an dah tur thu te leh Flying Squad te detail anih tur thu meeting ah hian a tarlang.

Committee chuan he inthlanna hi tluang, felfai, thianghlim leh muanawm taka neih anih theih nan mipui leh tlawmngai pawl te theihtawp chhuahpui turin a ngen bakah Kohhran hrang hrangte chu tawngtai sak turin a ngen bawk a ni.

Tarlang tawh angin he inthlanna atan hian State Election Commission-in hriattirna April ni 12 khan a chhuah tawh a.

N. Chawnpui leh Saihapui 'V' ah te hian seat 3 ve ve awmin khaw dang - N. Hlimen, Phainuam, Saiphai leh Saipum ah te hian seat 5 theuh a awm a. Heng seat 26 atan hian nimin thleng khan mi 95 in hming an pe lut a ni. Hming pe lut te hi vawiin khan endik niin inhnukdawk duh te tan naktuk thleng inhnuhdawhna hun hawn ani a. April ni 29 khian Candidate hming tarchhuah niin an symbol turte pek an ni ang a. May ni 19 zing dar 7 atangin tlai dar 4 thleng inthlanna hi neih a ni ang. Vote thlak zawh anih veleh vote tla te hi chhiar nghal a ni dawn a, May ni 24 aia tlai lovah Executive Body hi siam tur a ni ang.