Prisons Secretary Dr Dilraj Kaur, IAS chuan nimin chawhnu khan Central Jail a tlawh a, Jail tang te dinhmun leh an harsatna hrang hrang te ngaihthlak sak in a theih ang chin chinah hmalakpui a tum thu a hrilh a ni. Prisons Secretary hi I.G.Prisons Pu K.Rohmingthanga leh Prisons Joint Secretary Pu Lalbiakzama leh mi pawimawh dang ten an tawiawm a ni.

Tun dinhmunah Central Jail-ah hian mi 539 an tang mek a, chung zinga 478 chu mipa niin mi 19 chu hmeichhia an ni a. Tang mek ten an harsatna tlangpui an lo sawi lan zingah tui lama harsatna te, ambulance leh court panna tur motor indaih loh chungchang te leh Jail pindan hrang hrang tawt lutuk thu leh thil dang te a hnena an lo thlen te chu chhangin Dr Dilraj Kaur chuan a tul anga hma lakpui a inhuam thu leh Chief Minister hial hnenah pawh thlensak a tum thu a hrilh a ni. Jail hotute leh hnathawktute chu Jail tang te harsatna hriatsak thin tur leh a bik takin hmeichhe jail tang te chu uluk taka enkawl ngai an nih thu a sawi bawk. Jail tang te chuan hriselna tha an mamawh a, an khawsakna atana pawimawh leh mamawh a awm that a ngai a ni, a ti bawk.